საინფორმაციო სააგენტო Axios წყაროზე დაყრდნობით წერს, რომ აშშ-ისა და რუსეთის ოფიციალური პირების პირველი შეხვედრა უკრაინის ომის დასრულებასთან დაკავშირებით, საუდის არაბეთში 18 თებერვალს გაიმართება.

უკრაინული მხარე საუდის არაბეთში დაგეგმილ სამშვიდობო მოლაპარაკებებზე, გავრცელებული ცნობებით, არ მიუწვევიათ. ამასთან, Axios-ს გასულ დღეებში მიუნხენის უსაფრთხოების კონფერენციაზე უკრაინის პრეზიდენტმა ვოლოდიმირ ზელენსკიმ უთხრა, რომ უკრაინას აშშ-სგან რაიმე მიწვევა არ მიუღია. უკრაინის ხელისუფლება შეშფოთებულია იმით, რომ მოლაპარაკება კიევის ზურგსუკან მიმდინარეობს.

გამოცემის ცნობით, აშშ-ის დელეგაციაში სახელმწიფო მდივანი მარკო რუბიო, ეროვნული უსაფრთხოების მრჩეველი მაიკ უოლცი და ახლო აღმოსავლეთის წარმომადგენელი სტივ უიტკოფი იქნებიან. ერთ-ერთი წყაროს ცნობით, რუსეთის მხრიდან დელეგაციაში იქნება საგარეო საქმეთა მინისტრი სერგეი ლავროვი.