"ერთ მხარეს ჩემს წარმოსახვაში არის მზია ამაღლობელი გამოკეტილი პალატაში, შიმშილისგან 30-ე დღე სასომიხდილი. არ ვიცით, როგორ დამთავრდება ეს... ამაზე მქონდა მე პროტესტი, ჩემი ბრძოლა ეძღვნება ადამიანის ღირსებას", — განაცხადა ფსიქოლოგმა მაია ცირამუამ სხდომაზე, სადაც 9 პირი მოსამართლის სახლთან 30-წუთიანი საპროტესტო აქციის ჩატარებისთვის სასამართლოს წინაშე წარსდგა.

აქციის მონაწილეებმა 2025 წლის 26 იანვარს მოსამართლე მალხაზ ოქროპირაშვილის სახლთან სოლიდარობის სიმბოლური აქტით გააპროტესტეს მზია ამაღლობელის უკანონო პატიმრობა. მალხაზ ოქროპირაშვილი მოსამართლეა, რომელმაც არ განიხილა მზია ამაღლობელის სააპელაციო სარჩელი აღმკვეთი ღონისძიების სახით პატიმრობის გამოყენებასთან დაკავშირებით.

"მართლმსაჯულებამ გამოტოვა ყველაზე მნიშვნელოვანი, უაპელაციოდ ჩათვალა [მზია ამაღლობელი] დამნაშავედ და გამოკეტა. მეორე კადრსაც გეტყვით, სულ მეჭრება ეს კადრი, ბიჭი დაგდებული ქვაფენილზე, რომელსაც თავში ურტყამენ. ჩემი ბრძოლა ეძღვნება ყველაზე მაღალ სტანდარტს სამართალში, ადამიანის ღირსებას, ადამიანის სიცოცხლეს", — განაცხადა მაია ცირამუამ.

მოსამართლე ციცინო მოსიძემ მაია ცირამუა, ნინო ქათამაძე, გელა მთივლიშვილი, ვლადიმერ აფხაზავა, ხვიჩა ვაშაყმაძე, ირინა ზარანდია, ქეთევან ფილაური, ეკა კუხალაშვილი და გივი ცინცაძე 5-5 ათასი ლარით დააჯარიმა.