პარლამენტმა, ხმათა უმრავლესობით, ეროვნული ბანკის საბჭოს ოთხი წევრი დაამტკიცა, მათ შორისაა სოფლის მეურნეობის ყოფილი მინისტრი ოთარ შამუგია.

ოცნების არჩეულმა პრეზიდენტმა, მიხეილ ყაველაშვილმა ეროვნული ბანკის საბჭოს ოთხ ვაკანტურ თანამდებობაზე გარემოს დაცვისა და სოფლის მეურნეობის ყოფილი მინისტრი ოთარ შამუგია, ეროვნული ბანკის აღმასრულებელი დირექტორი ვახტანგ ბურკიაშვილი, ნინო ჯელაძე და ლევან ძნელაძე წარადგინა.

ოთხივე კანდიდატურა პარლამენტმა, ხმათა უმრავლესობით, დაამტკიცა.

"წელიწადნახევარზე მეტი ხნის განმავლობაში, ექს-პრეზიდენტის საბოტაჟის გამო ეროვნული ბანკის საბჭოს დაკომპლექტებას ვერ ვახდენდით. ეროვნული ბანკის საბჭოს 9-ის ნაცვლად, 5 წევრით საქმიანობა უწევდა.

მნიშვნელოვანია, რომ 26 ოქტომბრის არჩევნების შედეგად ამ საბოტაჟის დასრულება შევძელით. ეროვნული ბანკი საქმიანობას სრული შემადგენლობით გააგრძელებს", — განაცხადა “ოცნების” პარლამენტის თავმჯდომარემ შალვა პაპუაშვილმა.