თემურ ქათამაძე, რომელიც ბათუმის საპროტესტო აქციებზე დააკავეს, უკვე მე-12 დღეა შიმშილობს.

მედია "ბათუმელებთან" ინტერვიუში საქართველოს ახალგაზრდა იურისტთა ადვოკატი მარიამ გაბროშვილი ამბობს, რომ მან ქათამაძე დღეს, 28 იანვარს, იზოლატორში მოინახულა და დაკავებული ექიმის კონტროლის ქვეშ იმყოფება. საია ქათამაძის დაცვის საქმეში მაშინ ჩაერთო, როცა ის პოლიციამ საპროტესტო აქციაზე ადმინისტრაციული სამართალდარღვევის მუხლით დააკავა.

"დღესაც მოვინახულე და როგორც მითხრა, ექიმის კონტროლის ქვეშ არის და დეტალურად აღარ უსაუბრია", — ამბობს ადვოკატი.

გაბროშვილის თქმით, დღის წესრიგში მისი დაცვის ქვეშ მყოფი პირის ქვეყნიდან გაძევების საკითხი დგას.

"ახლა უკვე მისი ქვეყნიდან გაძევების საკითხი დგას დღის წესრიგში და ამ ნაწილში რაც იყო გასაჩივრებული, ჩვენ ვეხმარებით.

გაძევებაზე ჯერ გადაწყვეტილება არ არის მიღებული, თუმცა თემურ ქათამაძე წინა კვირას თავშესაფრის მაძიებლად დარეგისტრირდა და მოითხოვა ლტოლვილის ან ჰუმანიტარული სტატუსის მინიჭება და ამ საკითხზეა საია ჩართული, თუმცა უარი ეთქვა ამ მოთხოვნაზე.

თუმცა ამის გასაჩივრებაშიც დავეხმარებით, ერთი თვის ვადა აქვს ამისთვის.

გარდა ამისა, იზოლატორში რომ მოათავსეს გაძევების გადაწყვეტილებამდე, ესეც გასაჩივრებული გვაქვს", — ამბობს მარიამ გაბროშვილი.

ცნობისთვის, თემურ ქათამაძე პოლიციამ ორჯერ დააკავა. პირველად 11 იანვარს დააკავეს ბათუმის პოლიციის სამმართველოსთან აქციაზე, მეორედ კი – 17 იანვარს, იზოლატორიდან გამოსვლისთანავე. მას ამჯერად საქართველოში ცხოვრების უფლების არქონას ედავებიან.

17 იანვარს თემურ ქათამაძემ პროტესტის ნიშნად შიმშილობა დაიწყო.

როგორც ქათამაძეზე ამბობს, დაკავებისას მასზე ბათუმის პოლიციის უფროსმა, ირაკლი დგებუაძემ, 10 პოლიციელთან ერთად იძალადა. ამის შესახებ თემურ ქათამაძე წერს წერილში, რომელიც მან „ბათუმელებს“ გამოუგზავნა.