დღეს, 16 იანვარს კიევში ჩავიდა დიდი ბრიტანეთის პრემიერმინისტრი კირ სტარმერი. გამოცემა Guardian-ის ინფორმაციით, სტარმერი ზელენსკისთან შეხვედრაზე განიხილავს უკრაინის უსაფრთხოების გარანტიების საკითხებს. ის და უკრაინის პრეზიდენტი ვოლოდიმირ ზელენსკი ხელს მოაწერენ თავდაცვის და სხვა სფეროებში გრძელვადიანი თანამშრომლობის შეთანხმებას.

სტარმერმა კიევში განაცხადა, რომ რუსეთის პრეზიდენტმა პუტინმა უკრაინაში შეჭრით გრანდიოზული სტრატეგიული მარცხი განიცადა, რადგან დასავლეთისგან უკრაინის ჩამოშორების ნაცვლად, დღეს დასავლეთი და უკრაინა ერთმანეთთან ისე ახლოს არიან, როგორც არასდროს.

დიდი ბრიტანეთის ლეიბორისტული პარტიის ლიდერი კირ სტარმერი უკრაინაში პირველად ჩავიდა მას შემდეგ, რაც 2024 წლის ივლისში სათავეში ჩაუდგა გაერთიანებული სამეფოს მთავრობას.

კირ სტარმერი კიევში ჩავიდა აშშ-ის არჩეული პრეზიდენტის, დონალდ ტრამპის ინაუგურაციამდე რამდენიმე დღით ადრე. ევროპაში შიშობენ, რომ ტრამპი შეცვლის პრეზიდენტ ბაიდენის ადმინისტრაციის კურსს, რომელიც უკრაინის ძლიერ მხარდაჭერას ითვალისწინებდა.

გასულ კვირაში, დიდი ბრიტანეთის პრემიერ-მინისტრმა უკრაინის მხარდაჭერის საკითხი განიხილა საფრანგეთის პრეზიდენტ ემანუელ მაკრონთან.