ჟურნალისტ ზვიად ქორიძეზე თავდასხმას საქართველოს ჟურნალისტური ეთიკის ქარტია ეხმიანება და შინაგან საქმეთა სამინისტროს ინციდენტის დაუყოვნებლივ გამოძიებას და დამნაშავეთა მთელი სიმკაცრის დასჯისკენ მოუწოდებს — ამის შესახებ ქარტიის მიერ გავრცელებულ განცხადებაში ვკითხულობთ.

ჟურნალისტს და "საერთაშორისო გამჭვირვალობა — საქართველოს" რეგიონული ოფისების მენეჯერ ზვიად ქორიძე, რომელიც ბათუმში იმყოფებოდა "ნეტგაზეთის" და "ბათუმელების" დამფუძნებელი მზია ამაღლობელის პატიმრობის გამო, 14 იანვარს, გვიან ღამით ფიზიკურად და სიტყვიერად დაუპირისპირდნენ "ქართული ოცნების" წარმომადგენლები, დიმიტრი სამხარაძე, გიორგი მანველიძე და სხვა პირები. ქორიძეს თვალის მახლობლად აღენიშნება დაზიანება. მოგვიანებით, იგივე პირები, ფიზიკურად გაუსწორდნენ ყოფილ პრემიერმინისტრ გიორგი გახარიას.

ჟურნალისტური ეთიკის ქარტია დღეს, 15 იანვარს გავრცელებულ განცხადებაში აღნიშნავს, რომ ქორიძეზე თავდასხმა "არის ქართული ოცნების ხელისუფლების მავნებლური პოლიტიკის პირდაპირი შედეგი".

"ის წლების განმავლობაში აწარმოებდა კამპანიას დამოუკიდებელი და კრიტიკული ჟურნალისტების მიმართ სიძულვილის გასაღვივებლად და ახალისებდა სისასტიკესა და ძალადობას", — აცხადებს ქარტია.

ორგანიზაცია ასევე აცხადებს, რომ:

  • "26 ოქტომბრის არჩევნების შემდეგ „ქართული ოცნება“ ქვეყანაში კრიტიკული ხმების ჩასახშობად და მედიის გასანადგურებლად რეპრესიების მომდევნო ეტაპზე გადავიდა;

  • მის მიერ დაგეგმილი და განხორციელებული ძალადობრივი ქმედებების შედეგად მხოლოდ ნოემბრის ბოლოსა და დეკემბრის დასაწყისში პროფესიულ საქმიანობაში 100-მდე ჟურნალისტს შეეშალა ხელი;

  • ბევრმა მათგანმა მიიღო ფიზიკური დაზიანება, მათ შორის მძიმე.
  • დღემდე არ არის გამოვლენილი და დასჯილი არცერთი დამნაშავე".

"ბოლო კვირაში ამ ყოველივეს დაემატა გამოცემების "ბათუმელები" და "ნეტგაზეთი" დამფუძნებლის, მზია ამაღლობელის დაპატიმრება შეთითხნილი ბრალდებით და მის მიმართ მკაცრი სასჯელის — მრავალწლიანი საპატიმრო აღმკვეთი ღონისძიების — მოთხოვნა", — აცხადებს ქარტია.

გავრცელებულ განცხადებაში, ჟურნალისტური ეთიკის ქარტია "ქართულ ოცნებას" მოუწოდებს, რომ შეწყვიტოს ჟურნალისტებისა და მედიის წარმომადგენლების დევნა და შევიწროება, ხოლო შსს-ს მიმართავს, რომ "დაუყოვნებლივ გამოიძიოს ქართულ ოცნებასთან აფილირებული, ყოფილი და მოქმედი თანამდებობის პირების დანაშაულებრივი ქმედებები და კანონის მთელი სიმკაცრით დასაჯოს ისინი".