უკრაინის პრეზიდენტმა, ვოლოდიმირ ზელენსკიმ 2 იანვარს განაცხადა, რომ უკრაინა სირიასთან დიპლომატიური კავშირების აღდგენისთვის ემზადება.

ზელენსკის აღნიშნულ განცხადებას Reuters ავრცელებს, უკრაინის საგარეო საქმეთა მინისტრის, ანდრიი სიბიჰას სირიაში ვიზიტის შესახებ მოხსენების მოსმენის შემდეგ.

სიბიჰა დამასკოში სირიის დე ფაქტო მმართველ აჰმედ ალ-შარაას შეხვდა და სირიელ კოლეგასთან მოლაპარაკებებიც გამართა.

"ჩვენსა და უკრაინას შორის იქნება სტრატეგიული პარტნიორობა პოლიტიკურ, ეკონომიკურ, სოციალურ და ასევე მეცნიერო სფეროში", — განუცხადა სირიის ახალდანიშნულმა საგარეო საქმეთა მინისტრმა ასად ჰასან ალ-შიბანმა უკრაინელ სტუმარს.