ბათუმში, დროებით საცხოვრებელში, ცეცხლსასროლი იარაღით, უცხო ქვეყნის ოთხი მოქალაქეს: 2000 წელს დაბადებული ფ.თ., -ს, 1997 წელს დაბადებული ვ.დ. -ს , 2004 წელს დაბადებული ჩ.ჩ -ს და 2005 წელს დაბადებულ ა.ს. – ს მძიმე ჭრილობები მიაყენეს, რის შემდეგაც დამნაშავეები ადგილიდან მიიმალნენ — ამის შესახებ ინფორმაციას შინაგან საქმეთა სამინისტრო ავრცელებს. უწყების ცნობით შემთხვევა შურისძიების მოტივით მოხდა.

მიღებული ჭრილობების შედეგად, სამი პირი ადგილზე, ხოლო ერთი მოგვიანებით, სამედიცინო დაწესებულებაში გარდაიცვალა. პოლიციამ ბრალდებულები უკვე დააკავა.

"აჭარის პოლიციისა და შიდა ქართლი პოლიციის დეპარტამენტების თანამშრომლებმა, ცხელ კვალზე, ერთობლივად ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, დამამძიმებელ გარემოებაში, ორი ან მეტი პირის მიმართ ჯგუფურად ჩადენილი განზრახ მკვლელობის ბრალდებით უცხო ქვეყნის ორი მოქალაქე დააკავეს.

დაკავებულები არიან: 1986 წელს დაბადებული ი.ჯ და 1985 წელს დაბადებული ბ. თ.", — იუწყება შსს.

უწყების ცნობით, სამართალდამცველებმა ნივთმტკიცებად ამოიღეს სამი ცეცხლსასროლი იარაღი, ვაზნები და მჭიდი. მომხდარ ფაქტზე გამოძიება სისხლის სამართლის კოდექსის 109-ე მუხლის "ი" და "ლ" ქვეპუნქტებით მიმდინარეობს. დანაშაული 20 წლამდე ან უვადო თავისუფლების აღკვეთას ითვალისწინებს.