დღეს, 6 დეკემბერს, თბილისის საქალაქო სასამართლომ ძლიერი საქართველოს ერთ-ერთ ლიდერს, ალეკო ელისაშვილს, აღმკვეთი ღონისძიების სახით პატიმრობა შეუფარდა. აღნიშნულზე გადაწყვეტილება მიიღო მოსამართლე თამარ მჭედლიშვილმა, რითაც ბრალდების მხარის შუამდგომლობა დააკმაყოფილა.

სასამართლო სხდომის მიმდინარეობისას, მოსამართლემ ელისაშვილს როგორც დაკავებულის უფლებები გააცნო, რაზეც ოპოზიციური პარტიის ლიდერმა უპასუხა: "როცა დამაკავეს მაშინ უნდა წაეკითხათ ეს უფლებები, წიხლით რომ ჩამტენეს მანქანაში".

პროკურორის თქმით, ელისაშვილმა "ოცნების" წევრს, ალი ბაბაევს სიტყვიერი და ფიზიკური შეურაცხყოფა მიაყენა პოლიტიკურ მოღვაწეობასთან დაკავშირებით.

ამასთან, მან აღნიშნა, რომ "ბრალდების მხარემ მოიპოვა მტკიცებულებები, მათ შორის ვიდეომტკიცებულებები, რაც ელისაშვილის ბრალეულობას ამტკიცებს, ამიტომ არსებობს საფუძვლები იმისა, რომ ბრალდებულის მიმართ პატიმრობა იქნას გამოყენებული".

პროკურორის თქმით, ელისაშვილმა თავისუფლებაში ყოფნის შემთხვევაში ახალი დანაშაული შეიძლება ჩაიდინოს და როგორც ის ამბობს, არაა გამორიცხული მოწმეებზე მოახდინოს ზემოქმედება.

პროკურორმა განაცხადა, რომ ბრალდების მხარე არ ითხოვს გირაოს, იქიდან გამომდინარე, რომ გირაო ვერ უზრუნველყოფს აღკვეთის ღონისძიების მიზნების შესრულებას.

რაც შეეხება დაცვის მხარის პოზიციას, ადვოკატის თქმით, ელისაშვილს დაკავებისას პოლიციისთვის წინააღმდეგაა არ გაუწევია.

ადვოკატის მტკიცებით, ელისაშვილის მხრიდან არ არსებობს მიმალვის საფრთხე, ასევე გამორიცხულია ახალი დანაშაული ჩადენის საფრთხე, მათ შორის იმის გამოც, რომ მას არ გააჩნია წარსულში ნასამართლობა.

დაცვის მხარე ამბობს, რომ არსებულ ვიდეომტკიცებულებაზე დაკვირვების საფუძველზე ჩანს, რომ ელისაშვილი ბაბაევთან კონფლიქტისას აუცილებელი მოგერიების მდგომარეობაშია.

"ბაბაევი იღებს რკინის ჯოხს, ეპარება ელისაშვილს რომ მას ჩაარტყას", — განაცხადა ადვოკატმა სხდომაზე და აღნიშნა, რომ და "თუ რაიმე დანაშაული არის, არის მხოლოდ მეორე მხრიდან".

ადვოკატის მტკიცებით, ბაბაევის მხრიდან, ელისაშვილის მიმართ პოლიტიკური ნიშნით შეურაცხყოფა მოხდა.

ამასთან, როგორც ელისაშვილის დაცვის მხარემ სხდომაზე აღნიშნა, ყველაზე მკაცრი აღმკვეთი ღონისძიების გამოყენების საჭიროება არ დგას, რის გამოც სასამართლოს ალტერნატივის სახით სასამართლოს 3 000 გირაო შესთავაზა, თუმცა მოსარჩლემ ადვოკატების ეს შუამდგომლობა არ დააკმაყოფილა.

ცნობისთვის, ალეკო ელისაშვილს ბრალდება საქართველოს სისხლის სამართლის კოდექსის 156-ე მუხლის მე-2 ნაწილის "ა" ქვეპუნქტით (ადამიანის დევნა პოლიტიკურ მოღვაწეობასთან დაკავშირებით, ჩადენილი ძალადობით) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.