დღეს, თერჯოლის მერიასთან ანა რობაქიძემ ერთკაციანი საპროტესტო აქცია გამართა. პროტესტი საქართველოს პრემიერმინისტრის, ირაკლი კობახიძის განცხადებას უკავშირდება, რომლის მიხედვითაც, ოცნების ხელისუფლებამ ევროინტეგრაციის მოლაპარაკებების დაწყების პროცესი 2028 წლამდე შეაჩერა.

მანამდე, რობაქიძემ სოციალურ ქსელში დაწერა, რომ საქართველოში მიმდინარე საპროტესტო გამოსვლებს შეუერთდებოდა და თერჯოლის მერიასთან საპროტესტო ბანერით იდგებოდა ხელში წარწერით — "ქოცობა დამღუპველია", "სოლიდარობა კრიტიკულ მედიას", "გაბედე, გააპროტესტე".

"თერჯოლის მერიასთან ვიდგები, მოდით და დადექით ვისაც გული შეგტკივათ!
წეღან ჩამოვფრინდი, გამოუძინებელი და მოუწესრიგებელი ვარ. გული გამისკდებოდა, ჩემი ხმა ფეისბუქს რომ არ გასცდენოდა.

პირდაპირ ეთერს ჩავრთავ და ვიდგები ჩემი ბანერით. კაციშვილს ხელს არ შევუშლი.
დედაჩემს ეშინია და გასაგებია, რატომაც. ერთი ზუსტად ვიცი, მამაჩემი და ჩემი და მაგრად იამაყებდნენ ჩემით", — წერს მოქალაქე ანა რობაქიძე სოციალურ ქსელში.