რუსეთის ფედერაციის საგარეო საქმეთა სამინისტროს პრესსპიკერ მარია ზახაროვას განცხადებით, დასავლეთს საქართველოში ხელისუფლების შეცვლა და ისეთი მთავრობის მოყვანა უნდა, რომელიც მათ სასარგებლოდ იმუშავებს.

"აშშ-სა და ევროკავშირს კავკასიაში ქაოსი, სიტუაციის დესტაბილიზება სურთ. მათი სურვილი საქართველოში ხელისუფლების შეცვლა და ისეთი ხელისუფლების მოყვანაა, რომელიც დასავლეთის სასარგებლოდ იმუშავებს და არა საქართველოსთვის, ან ქართველი ხალხისთვის", — განაცხადა მარია ზახაროვამ.

ზახაროვამ განაცხადა ისიც, რომ ოფიციალური ბრიუსელი საქართველოს დასჯით ემუქრება სუვერენული კურსის გამო.

"როდესაც ისინი საუბრობენ რუსეთის ჩარევაზე, ეს არის სიტუაცია, როდესაც ქურდს ქუდი ეწვის. ისინი ამას აკეთებენ იმისათვის, რომ დაფარონ საკუთარი დასავლური დანაშაული", — აღნიშნა ზახაროვამ.

ზახაროვა დარწმუნებულია, რომ ქართველი ხალხი დასავლეთის პროვოკაციას არ წამოეგება და საკუთარი იდენტობის დაცვას შეძლებს.