კრემლის პრესსპიკერმა, დიმიტრი პესკოვმა ვლადიმირ პუტინისა და დონალდ ტრამპის სატელეფონო საუბრის შესახებ გავრცელებული ცნობები უარყო.

პესკოვმა გავრცელებულ ინფორმაციას ცრუ და გამოგონილი ამბავი უწოდა.

"ეს არის ძალიან კარგი მაგალითი იმისა, თუ როგორი ხარისხის არის ინფორმაცია, რომელიც ზოგჯერ პატივსაცემ გამოცემებშიც კი იბეჭდება. ეს სიმართლეს არ შეესაბამება. ეს არის გამოგონილი ამბავი, უბრალოდ ცრუ ინფორმაცია", — თქვა პესკოვმა.

გამოცემა Washington Post-ის ექსკლუზიური ინფორმაციით, 7 ნოემბერს აშშ-ს ახლად არჩეულმა პრეზიდენტმა დონალდ ტრამპმა ვლადიმირ პუტინთან სატელეფონო საუბარი გამართა. გამოცემის ცნობით, ტრამპმა პუტინს უკრაინაში ომის ესკალაციისგან თავის შეკავება ურჩია და ევროპაში ამერიკული სამხედრო განლაგებების შესახებ შეახსენა.