გაერთიანებული სამეფოს თავდაცვის მინისტრმა, ჯონ ჰეილიმ იმედი გამოთქვა, რომ აშშ-ის ახლად არჩეული პრეზიდენტი, დონალდ ტრამპი მოკავშირეებთან ერთად უკრაინის მხარდაჭერას განაგრძობს.

ამის შესახებ მან მედიასთან ისაუბრა.

"მოლოდინი მაქვს, რომ აშშ განაგრძობს მოკავშირეებთან ერთად უკრაინის მხარდაჭერას იქამდე, სადამდეც ეს საჭირო იქნება", – ამბობს ჰეილი.

იგი ასევე ფიქრობს, რომ ტრამპი NATO-ს ერთგული დარჩება, თუმცა, ზოგიერთმა ევროპულმა სახელმწიფომ თავდაცვისთვის მეტი უნდა დაახარჯოს.

"არ მგონია, რომ აშშ ზურგს შეაქცევს NATO-ს. ისინი იაზრებენ ალიანსისა და ევროპაში დამატებითი კონფლიქტის თავიდან არიდების მნიშვნელობას", – თქვა ჰეილიმ.

Axios-მა რამდენიმე დღის წინ, ანონიმურ წყაროებზე დაყრდნობით დაწერა, რომ აშშ-ს არჩეული პრეზიდენტის, დონალდ ტრამპისა და უკრაინის პრეზიდენტის, ვოლოდიმირ ზელენსკის სატელეფონო საუბარი ზელენსკისთვის მეტწილად იმედისმომცემი იყო.

გავრცელებული ინფორმაციით, ორი ქვეყნის ლიდერების სატელეფონო საუბარში SpaceX-ის, Tesla-ს, Starlink-ისა და X-ის აღმასრულებელი დირექტორი, ილონ მასკიც მონაწილეობდა.

გამოცემის თქმით, ტრამპსა და ზელენსკის შორის სატელეფონო საუბარი გრძელდებოდა 25 წუთი, ხოლო მილოცვის შემდეგ, ტრამპმა ზელენსკის მხარდაჭერა აღუთქვა, თუმცა არ დაუკონკრეტებია როგორ.

ამასთან, გამოცემა წერს, მასკმა საუბრისას თქვა, რომ Starlink-ით უკრაინის მხარდაჭერას გააგრძელებდა