ვიცი, რომ თქვენ დიდი პაუზა გაქვთ ევროკავშირის გზაზე, თუმცა დარწმუნებული ვარ, რომ თქვენ იქ მოხვდებით, თქვენ გაიმარჯვებთ, — ამის შესახებ უკრაინის პრეზიდენტმა, ვოლოდიმირ ზელენსკიმ ბუდაპეშტში, ევროპის პოლიტიკური გაერთიანების სამიტზე მთავარ არხთან საუბრისას განაცხადა და აღნიშნა, რომ საქართველოს პრემიერმინისტრ ირაკლი კობახიძესთან კომუნიკაცია ბუდაპეშტში მიმდინარე ღონისძიებების დროს არ ჰქონია.

"ქართველები ძალიან კარგი ხალხია, მე თქვენ ძალიან მიყვარხართ, ვიცი, რომ თქვენ დიდი პაუზა გაქვთ ევროკავშირის გზაზე, თუმცა დარწმუნებული ვარ, რომ თქვენ იქ მოხვდებით, თქვენ გაიმარჯვებთ", — განაცხადა ზელენსკიმ.

საქართველო-უკრაინას შორის ურთიერთობების შესახებ კითხვის საპასუხოდ უკრაინის პრეზიდენტმა თქვა, რომ დღეს უკრაინას "არ აქვს კომუნიკაცია საქართველოს ხელისუფლებასთან, რაც ძალიან ცუდია".

"საქართველოსა და უკრაინის ურთიერთობაზე საუბარს 5 წუთზე მეტი სჭირდება. მე მჯერა, რომ ჩვენ გვექნება ძალიან ძლიერი ურთიერთობები. ჩვენ გვქონდა ეს და გვექნება მომავალშიც. მე ამაში დარწმუნებული ვარ. დღეს ჩვენ არ გვაქვს კომუნიკაცია საქართველოს ხელისუფლებასთან, მე ვთვლი, რომ ეს ძალიან ცუდია", — განაცხადა ზელენსკიმ.

რაც შეეხება საქართველოში ჩატარებულ არჩევნებს, მისი თქმით, "ქართველმა ხალხმა თვითონ უნდა აირჩიოს ხელისუფლება, რუსეთს არ უნდა ჰქონდეს ამაზე გავლენა”.

"ეს ძალიან დიდი პრობლემაა ვფიქრობ, რომ ქართველმა ხალხმა თვითონ უნდა აირჩიოს ხელისუფლება, რუსეთს არ უნდა ჰქონდეს ამაზე გავლენა", — თქვა უკრაინის პრეზიდენტმა (მთავარი არხის თარგმანი).

თუ გაინტერესებს მსოფლიოში მიმდინარე მნიშვნელოვანი ამბები, გაწევრიანდით ჯგუფში — რა ხდება მსოფლიოში