თბილისში ოპოზიციური პარტიების წევრებისა და მათი მხარდამჭერების მონაწილეობით მსვლელობა დაიწყო. ხალხის ნაკადი საქართველოს და ევროკავშირის დროშებით ხელში სადგურის მოედნიდან რუსთაველის გამზირის მიმართულებით გადაადგილდება. ოპოზიციის ლიდერები აცხადებენ, რომ მათი მთავარი მოთხოვნა გაყალბებული არჩევნების შედეგების გაუქმება და ახალი არჩევნების დანიშვნაა.

"დღევანდელი მსვლელობის მიზანია კიდევ ერთხელ გამოვფხიზლდეთ და გამოვიდეთ ქუჩაში ჩვენი არჩევანის დასაცავად. ვიკრიბებით რუსთაველის გამზირზე, ვიკრიბებით იმიტომ, რომ შედეგზე, გამარჯვებაზე ორიენტირებული აქცია დავიწყოთ. ოპოზიცია არის ერთიანი, როგორც არასდროს", — აცხადებს კოალიცია ერთიანობა-ნაციონალური მოძრაობის ლიდერი თინა ბოკუჩავა.

საზოგადოებისთვის დეტალური ინფორმაციის მიწოდებას პროტესტის ფორმასთან დაკავშირებით ოპოზიციის ლიდერები დღეს აქციაზე გეგმავენ.

პარლამენტის შენობასთან სცენა უკვე დამონტაჟებულია და მთავარი აქცია ზუსტად 19:00 საათზე დაიწყება, სადაც ოპოზიციონერი პოლიტიკოსები აქციაზე მისულ საზოგადოებას სამოქმედო გეგმას გააცნობენ.