ირანში თეირანის უნივერსიტეტის სტუდენტი ქალი მას შემდეგ დააკავეს, რაც ის უნივერსიტეტის კამპუსში, პროტესტის ნიშნად, ნაწილობრივ გაშიშვლდა. ამის შესახებ ირანულმა ტელეგრამის არხებმა და უფლებადამცველებმა განაცხადეს. მათი ინფორმაციით, უშიშროების სამსახურების თანამშრომლები ჰიჯაბის არასწორად ტარების გამო სტუდენტს ფიზიკურად გაუსწორდნენ.

სოციალურ ქსელებში ასევე წერენ, რომ უშიშროების ძალებმა და პროსამთავრობო ახალგაზრდული ორგანიზაცია "ბასიჯის" წარმომადგენლებმა დაკავებულს ტანსაცმელი შემოახიეს. თუმცა ზოგიერთი თვითმხილველი ამტკიცებს, რომ სტუდენტმა ტანსაცმელი თავად გაიხადა.

ასევე ვრცელდება ინფორმაცია, რომ სტუდენტი პოლიციაში წაიყვანეს და მასთან კონტაქტი შეწყდა. ამასთან, უნივერსიტეტის წარმომადგენელი აცხადებს, რომ დაკავებული ფსიქიკურად დაავადებულია და ის კლინიკაში გაგზავნეს.

გაეროს სპეციალურმა მომხსენებელმა ირანში ადამიანის უფლებათა საკითხებზე განაცხადა, რომ იგი ყურადღებით აკვირდება თეირანში მომხდარს. უფლებადამცველმა ორგანიზაცია Amnesty International-მა დაკავებულის დაუყოვნებლივ გათავისუფლება და ადვოკატთან და ოჯახთან ხელმისაწვდომობის გარანტია მოითხოვა. აპრილში, ირანის ისლამური რევოლუციის გუშაგთა კორპუსმა გამოაცხადა ქვეყანაში ახალი სამართალდამცავი სააგენტოს შექმნის შესახებ, რომელიც ქალებისთვის ითვალისწინებს მკაცრი ჩაცმულობის კოდექსის დაცვას. ეს განცხადება მოჰყვა ცნობებს, რომ ირანის ხელისუფლებამ ბოლო დღეებში გააძლიერა მორალის დაცვის შემოწმება, რომლის ფარგლებშიც, როგორც ფოტოები მოწმობს, რეიდების მონაწილეები ქალების მიმართ ძალადობდნენ.