საქართველოს პრემიერმინისტრის, ირაკლი კობახიძის თქმით, საქართველოში არ არსებობს პარტია, რომელზეც რუსეთს გავლენა აქვს. ამის შესახებ კობახიძემ გამოცემა Euronews-თან მიცემულ ინტერვიუში განაცხადა.

"შემიძლია ვთქვა, რომ რუსეთს საქართველოში გავლენები არ აქვს. არ არსებობს პოლიტიკური პარტიები, რომლებიც ასეთი გავლენით ისარგებლებდნენ. არც რუსული გავლენის ქვეშ მყოფი მედიასაშუალებები არსებობს. ამიტომაც, რუსეთს არ შეუძლია არსებითი გავლენა მოახდინოს არჩევნებზე საქართველოში, — განაცხადა ირაკლი კობახიძემ.

პრემიერის თქმით, მათი მთავრობა პროევროპულია და ეს ქმედებებითაც დაამტკიცეს.

"ჩვენ გარკვევით პროევროპელები ვართ, როგორც მთავრობა. და ეს ჩვენი ქმედებებითაც დავამტკიცეთ. და კიდევ ერთხელ, ჩვენ გადავდგით კონკრეტული ნაბიჯები, რომლითაც მოვახერხეთ ქვეყანა ევროკავშირისკენ წაგვეყვანა. სწორედ ამიტომ, არ არსებობს სივრცე იმგვარი მანიპულაციებისთვის, როგორსაც ოპოზიცია მიმართავს. ეს მათი არჩევანია. ეს მათი საქმეა და დემოკრატიის ნაწილია. ჩვენ ყველაფერს გავაკეთებთ, რათა მომავალში წინ წავწიოთ ევროკავშირში გაწევრიანების პროცესი", — განაცხადა ირაკლი კობახიძემ Euronews-ითან.