კვლევები აჩვენებს, რომ საარჩევნო პროცესისადმი უნდობლობის შედეგი შესაძლოა სხვადასხვაგვარი იყოს; ერთი მხრივ, უნდობლობამ შესაძლოა უბიძგოს მოქალაქეებს, არ მიიღონ მონაწილეობა არჩევნებში. მეორე მხრივ, პირიქით, საარჩევნო პროცესის უნდობლობამ მოტივაცია მისცეს მოქალაქეებს, წვლილი შეიტანონ საარჩევნო პროცესში.

კავკასიის ბარომეტრის პერიოდული კვლევები ცხადყოფს, რომ საქართველოში 2012-2024 წლებს შორის საარჩევნო პროცესის მიმართ მოსახლეობის ნდობა შემცირებულია. ამასთანავე, შემცირებულია მოსახლეობის წილი, ვინც 2012 წლის შემდეგ არჩევნებში მონაწილეობდა.

Freedom House-მა წარმოადგინა "საარჩევნო მოწყვლადობის საწინააღმდეგო ზომების ინდექსი", რომელიც აფასებს, თუ რამდენად დაცულია მოქალაქის საარჩევნო ხმა ძალადობრივი ან მანიპულაციური მეთოდებისგან. ინდექსი სხვადასხვა მიმართულებას აფასებს. საქართველოს შემთხვევაში კი ყველაზე სუსტი მიმართულებები ადამიანის უფლებების დაცვა და ელექტორატული სისტემაა.

მიუხედავად წლების განმავლობაში არჩევნებში მონაწილეობის მოტივაციის კლებისა, 2024 წლის არჩევნებისთვის მოსალოდნელია, ტენდენცია შეიცვალოს და აქტივობამ იმატოს. ამ ვარაუდის მიზეზებს შორისაა, მაგალითად, ის, რომ 2012 წელთან შედარებით, 2024 წელს საზღვარგარეთის სპეც. სიაში არსებულ ამომრჩეველთა რაოდენობა გაორმაგდა.

საარჩევნო პროცესებისადმი მაღალი უნდობლობის პირობებში, კიდევ უფრო იზრდება ადგილობრივი თუ საერთაშორისო სადამკვირვებლო მისიების მნიშვნელობა. თითოეული მოქალაქის თავისუფალი არჩევანი უნდა იყოს დაცული!