უკრაინის პრეზიდენტმა ვლადიმერ ზელენსკიმ განაცხადა, რომ ჩრდილოეთ კორეა რეალურად უკრაინის წინააღმდეგ ომში რუსეთის მოკავშირედ ჩაერთო. ამის შესახებ ეხო კავაკზა წერს.

14 ოქტომბრის ვიდეომიმართვაში უკრაინის პრეზიდენტმა აღნიშნა, რომ მოისმინა სადაზვერვო სამსახურების ხელმძღვანელების — საგარეო დაზვერვის სამსახურისა და მთავარი დაზვერვის დირექტორატის მოხსენებები, რომლებიც ასეთ შეფასებებს შეიცავდა.

13 ოქტომბერს, ზელენსკიმ უკვე განაცხადა, რომ ჩრდილოეთ კორეა რუსეთს არა მხოლოდ იარაღით, არამედ, სავარაუდოდ, ჯარისკაცებითაც ამარაგებს. სამხრეთ კორეის თავდაცვის მინისტრი იყო პირველი, ვინც გასულ კვირას ასეთი განცხადებები გააკეთა და განაცხადა, რომ უკრაინაში უკვე იყო მსხვერპლი ჩრდილოეთ კორეის სამხედრო პერსონალს შორის.

The Washington Post, ოფიციალურ პირებზე დაყრდნობით, წერდა, რომ ჩრდილოეთ კორეელი სამხედრო სპეციალისტები რუსეთსა და მის მიერ ოკუპირებულ უკრაინის ტერიტორიებზე გაგზავნეს, რათა რუსეთს ფხენიანის მიერ მოწოდებული ბალისტიკური რაკეტების გამოყენებაში დაეხმარონ. იგივე იტყობინება The Guardian. ჯერჯერობით არ არსებობს არანაირი მტკიცებულება რუსეთის ტერიტორიაზე საომარ მოქმედებებში ჩრდილოეთ კორეელი ჯარისკაცების მონაწილეობის შესახებ. ფხენიანსა და მოსკოვს ამ ინფორმაციაზე კომენტარი არ გაუკეთებიათ.

დასავლეთის ქვეყნებმა არაერთხელ დაადანაშაულეს ჩრდილოეთ კორეა რუსეთისთვის საბრძოლო მასალის მიწოდებაში. გასულ კვირას The Times-მა დასავლური დაზვერვის წყაროებზე დაყრდნობით დაწერა, რომ ჩრდილოეთ კორეა აწვდის რუსეთს საარტილერიო ჭურვების დაახლოებით ნახევარს, რომელსაც ის უკრაინის წინააღმდეგ ომში იყენებს. ამის შესახებ რუსული გამოცემა მედუზაც წერს.

როგორც ცნობილია, პუტინმა და კიმ ჩენ ინმა ხელი მოაწერეს "ყოვლისმომცველი პარტნიორობის შეთანხმებას", სადაც წერია, რომ ერთ-ერთ მხარეზე შეიარაღებული თავდასხმის შემთხვევაში, მეორე იღებს ვალდებულებას, დაუყოვნებლივ უზრუნველყოს სამხედრო და სხვა დახმარება მის ხელთ არსებული ყველა საშუალებით. მათი თქმით, საიდუმლო შეთანხმება ჩრდილოეთ კორეის იარაღის რუსეთში მიწოდების შესახებ, სავარაუდოდ, 2023 წლის ივლისის ბოლოს სერგეი შოიგუს ფხენიანში ვიზიტის დროს დაიდო. აგვისტოში კი მისი საკონტეინერო ტრანსპორტირება დაიწყო რასონის პორტიდან აღმოსავლეთ სანაპიროზე.