აზერბაიჯანელი ჟურნალისტი, აფგან სადიგოვი გლდანის ციხის სამედიცინო დაწესებულებაში 24-ე დღეა შიმშილობს — ამის შესახებ ინფორმაციას News.on.ge-ს სოციალური სამართლიანობის ცენტრის დირექტორი თამთა მიქელაძე უზიარებს.

სადიგოვის ჯანმრთელობის მდგომარეობა მძიმეა. ჟურნალისტმა პროტესტის უკიდურეს ფორმას 21 სექტემბერს მიმართა, მას შემდეგ, რაც შინაგან საქმეთა სამინისტროს მიგრაციის დეპარტამენტმა 2024 წლის 16 სექტემბერს საქართველოში საერთაშორისო დაცვაზე უარი უთხრა.

აზერბაიჯანული Azel.Tv-ის მთავარი რედაქტორი 3 აგვისტოს თბილისში დააკავეს. საქართველოში ის 2023 წლის დეკემბერში ჩამოვიდა და დაკავებამდე ორი კვირით ადრე ქვეყნის დატოვებას ცდილობდა, მაგრამ აეროპორტში ამის საშუალება არ მისცეს.

სადიგოვს აზერბაიჯანის რესპუბლიკაში ბრალად დიდი ოდენობით ქონების ხელში ჩაგდების მიზნით შეურაცხმყოფელი ინფორმაციის გავრცელების მუქარა ედება. სადიგოვის ოჯახი აზერბაიჯანული მხარის ბრალდებას ტყუილს უწოდებს და ამბობს, რომ ქვეყანაში დაბრუნების შემთხვევაში მას სიკვდილი ემუქრება. აღსანიშნავია, რომ აფგან სადიგოვმა მხოლოდ დაკავების შემდეგ გაიგო, რომ ის ძებნილია და მის წინააღმდეგ სისხლის სამართლის საქმეა აღძრული აზერბაიჯანში.