ცესკოს უახლესი მონაცემით, საზღვარგარეთ ხმის მიცემის უფლების მქონე ამომრჩეველთა რაოდენობა 95 834-ია.

უწყების ცნობით, ეს მონაცემები საბოლოო არაა და ჯერ კიდევ მიმდინარეობს ინფორმაციის დაზუსტება სხვადასხვა უწყებასთან.

ცესკოს თავმჯდომარის, გიორგი კალანდარიშვილის თქმით, საზღვარგარეთ კიდევ 7 საარჩევნო უბანი გაიხსნება. დამატებითი უბნები შეიქმნება: ნიუ-იორკში, ბერლინში, ბარსელონაში, რომში, ათენში, სალონიკში, პარიზში. მისივე თქმით, 26 ოქტომბრის არჩევნებზე 42 ქვეყნის 53 ქალაქში 67 საარჩევნო უბანი მოემსახურება საქართველოს მოქალაქეებს.

აღსანიშნავია, რომ დღევანდელ სხდომაზე ცენტრალური საარჩევნო კომისია ისრაელში საარჩევნო უბნის დახურვაზე არ იმსჯელებს — წევრთა გადაწყვეტილებით, საკითხი სხდომის დღის წესრიგში არ შევიდა. გიორგი კალანდარიშვილმა კომისიას საგარეო საქმეთა სამინისტროს მიმართვა გააცნო. მიმართვაში უწყება ისრაელში საომარი მდგომარეობის გამო უსაფრთხოების გამოწვევებზე საუბრობს.