"ჩვენ გამოვდივართ იმ გეოპოლიტიკური რეალობის აღიარების აუცილებლობიდან, რომელიც გაჩნდა რეგიონში 2008 წლის აგვისტოს შემდეგ", — ასე ეხმაურება ოკუპირებული სამხრეთ ოსეთის საგარეო საქმეთა სამინისტრო საქართველოს პრემიერ-მინისტრის, ირაკლი კობახიძის განცხადებას.

მათი თქმით, "წარსული არ უშვებს საქართველოს და ქართველ პოლიტიკოსები" და "საქართველოს მიერ სამხრეთ ოსეთის რესპუბლიკასთან უსაფრთხოების გარანტიების შესახებ იურიდიულად სავალდებულო დოკუმენტის ხელმოწერა კვლავ საკვანძო რჩება".

"ყურადღება გავამახვილეთ საქართველოს პრემიერ-მინისტრის ირაკლი კობახიძის მიერ ნიუ-იორკში მიმდინარე გაეროს გენერალური ასამბლეის 79-ე სესიაზე გამოსვლისას გაკეთებულ განცხადებებზე.

სამწუხაროდ, ოფიციალური თბილისის პოზიციამ არ განიცადა ფუნდამენტური ცვლილებები სამხრეთ ოსეთთან და აფხაზეთთან მიმართებაში. არარსებული ტერმინოლოგიითა და ფაქტებით მოქმედება, რეალობისგან შორს მყოფი რიტორიკა იმაზე მეტყველებს, რომ წარსული არ უშვებს საქართველოს და ქართველ პოლიტიკოსებს.

სამხრეთ ოსეთის პოზიცია ცნობილია და ის წლების განმავლობაში არაერთხელ გაჟღერდა. საქართველოს მიერ სამხრეთ ოსეთის რესპუბლიკასთან უსაფრთხოების გარანტიების შესახებ იურიდიულად სავალდებულო დოკუმენტის ხელმოწერა კვლავ საკვანძო რჩება. ამავდროულად, ჩვენ გამოვდივართ იმ გეოპოლიტიკური რეალობის აღიარების აუცილებლობიდან, რომელიც გაჩნდა რეგიონში 2008 წლის აგვისტოს შემდეგ", — ნათქვამია გავრცელებულ განცხადებაში.

შეგახსენებთ, რომ 25 სექტემბერს ირაკლი კობახიძემ გაეროს გენერალურ ასამბლეაში სიტყვით გამოსვლისას განაცხადა, რომ "უნდა აღვადგინოთ ყველა დანგრეული ხიდი ჩვენს ქვეყანაში" და ხელისუფლების ყველა ნაბიჯი მიმართულია იმისკენ, რომ ერთად შევძლოთ ცხოვრება ბედნიერ, გაერთიანებულ და განვითარებულ საქართველოში".

"მინდა, ვისარგებლო ამ შესაძლებლობით და მივმართო ჩვენს ხალხს საოკუპაციო ხაზის მეორე მხარეს, აფხაზეთისა და ცხინვალის რეგიონებში. ჩვენი ყველა ნაბიჯი მიმართულია იმისკენ, რომ დავეხმაროთ ჩვენს ხალხს და ერთ დღეს ჩვენ, ჩვენს შვილებთან ერთად, შევძლოთ ერთად ცხოვრება ბედნიერ, გაერთიანებულ და განვითარებულ საქართველოში. საოკუპაციო ხაზის ამ მხარეს ჩვენ ყოველთვის გულღიად მიგიღებთ. ჩვენ უნდა აღვადგინოთ ყველა დანგრეული ხიდი ჩვენს ქვეყანაში," — განაცხადა პრემიერმა.