უნგრეთის პრემიერ-მინისტრმა ვიქტორ ორბანმა განაცხადა, რომ ევროკომისიის წევრად კვლავ ოლივერ ვარჰეის წარადგენს.

"ბოლო ხუთი წლის განმავლობაში, კომისარმა ვარჰეიმ დაამტკიცა, რომ ევროკავშირს შეუძლია ცვლილებების შეტანა, როგორც დადებით ძალას, სამეზობლოსა და მის ფარგლებს გარეთ", — დაწერა ორბანმა X-ზე . "ის შესანიშნავ საქმეს გააკეთებს მომავალ კომისიაშიც!"

ეს არჩევანი ბრიუსელში სადავო იქნება. ვარჰეი 2019 წლიდან იკავებდა სამეზობლო და გაფართოების საკითხებში კომისრის თანამდებობას. მისი საქმიანობა ბრიუსელის ოფიციალური პირების კრიტიკას ხშირად იმსახურებდა კანონის უზენაესობისა და დემოკრატიის პრობლემების მქონე კანდიდატ ქვეყნებთან მიდგომის გამო.

ევროკომისარი ოლივერ ვარჰეი, 23 მაისს, ირაკლი კობახიძემ მუქარაში დაადანაშაულა, თუმცა იმავე დღეს მისი გვარი არ დაუსახელებია.

კობახიძემ თქვა, რომ დაემუქრნენ ფრაზით, "ხომ ნახეთ, ფიცოს რა დაემართა და ძალიან ფრთხილად უნდა იყოთო".

საქართველოს პრემიერ-მინისტრმა ეს განცხადება "გლობალური ომის პარტიას" დაუკავშირა.

  • იმავე დღეს გაავრცელა განცხადება ოლივერ ვარჰეიმაც და სწორედ მისი განცხადებით გაირკვა, თუ რომელ ევროკომისარს უკავშირებდა ირაკლი ღარიბაშვილი "უაღრესად საშიშ ძალას".
  • სამეზობლო პოლიტიკისა და გაფართოების საკითხებში უნგრელმა ევროკომისარმა დაადასტურა, რომ ირაკლი კობახიძესთან სატელეფონო საუბარი ჰქონდა.
  • თუმცა, ევროპელმა მაღალჩინოსანმა ხაზგასმით აღნიშნა, რომ მისი ნათქვამი, სლოვაკეთის პრემიერ-მინისტრთან დაკავშირებით, კობახიძემ საზოგადოებას კონტექსტიდან ამოგლეჯილად მიაწოდა, "რამაც შინაარსი მთლიანად შეცვალა".