მოკლედ: ეუთო/ოდირმა, საქართველოს პარლამენტის მიერ, გენდერული კვოტირების გაუქმება უარყოფითად შეაფასა და პოლიტიკურ და საჯარო ცხოვრებაში, ქალთა მიმართ დისკრიმინაციის აღმოფხვრასთან დაკავშირებულ ადამიანის უფლებათა საერთაშორისო სტანდარტებთან შეუსაბამოდ მიიჩნია.

• ინფორმაციას საქართველოს სახალხო დამცველი ავრცელებს.

დეტალები: დასკვნის მიხედვით, არ არსებობს მტკიცებულება ვარაუდისათვის, რომ გენდერული კვოტების გაუქმება აუცილებელი იყო კონსტიტუციურობის საფუძვლით, ან საერთაშორისო ვალდებულებებთან შესაბამისობის თვალსაზრისით, არაეფექტურობისა თუ იმის გამო, რომ საჭირო აღარ იყო.

• "მიუხედავად იმისა, რომ გენდერული ბალანსი საქართველოს პარლამენტში ნელა, თუმცა თანდათანობით უმჯობესდებოდა სავალდებულო გენდერული კვოტებისა და ფინანსური წახალისების შემოღების გამო, ის კვლავ დაბალი რჩება ეუთოს რეგიონის სხვა ქვეყნებთან შედარებით და არ აღწევს საერთაშორისო და რეგიონული სტანდარტებითა და რეკომენდაციებით გათვალისწინებულ მიზნობრივ მაჩვენებლებს", — წერს სახალხო დამცველი.

დასკვნაში აღნიშნულია, რომ კანონპროექტების თანმხლები განმარტებითი ბარათები არ შეიცავს კონკრეტულ მტკიცებულებას, მონაცემს ან ფაქტს, გენდერული კვოტის მოქმედების მექანიზმის სიღრმისეულ ანალიზს ან მის შესაძლო ალტერნატივას და ვერ ასაბუთებს საარჩევნო გენდერული კვოტებისა და პარტიების ფინანსური წახალისების სისტემის გაუქმების საჭიროებას.

• დასკვნაში ყურადღება გამახვილებულია პროცედურულ ხარვეზებზე, კანონპროექტების დაჩქარებულად მიღებაზე, განხილვის პროცესში ადეკვატური და ინკლუზიური მონაწილეობისა და დაინტერესებულ მხარეებთან რელევანტური კონსულტაციების არარსებობაზე, არჩევნების სიახლოვეს საარჩევნო სისტემის არსებითი ელემენტების ცვლილების უარყოფით მხარეებსა და საარჩევნო კანონმდებლობის სტაბილურობის პრინციპის გაუთვალისწინებლობაზე:
• "დასკვნაში დეტალურად არის მიმოხილული საერთაშორისო ვალდებულებები პოლიტიკურ და საჯარო ცხოვრებაში გენდერული თანასწორობის ხელშეწყობის მიმართულებით, ასევე მოცემულია კონკრეტული რეკომენდაციები".

კონტექსტი: 1-ელ აპრილს, პარტია გირჩი გამოვიდა ინიციატივით, რომ გაუქმებულიყო პარლამენტში გენდერული კვოტირება, კონკრეტულად, საარჩევნო კოდექსის 203-ე მუხლი, რომელიც პოლიტიკურ პარტიებს ავალდებულებდა, მათ პროპორციულ სიაში ყოველი მე-4 კანდიდატი განსხვავებული სქესის ყოფილიყო.

• ცვლილებას თავიდანვე მხარი დაუჭირა მმართველმა პარტიამ, ქართულმა ოცნებამ.
• 4 აპრილს, დაჩქარებული წესით განხილულ კანონპროექტს მესამე მოსმენით უყარეს კენჭი და შედეგად, საქართველოს პარლამენტმა გენდერული კვოტები გააუქმა.
• 18 აპრილს, საქართველოს პრეზიდენტმა, სალომე ზურაბიშვილმა, გენდერული კვოტების გაუქმების კანონპროექტს ვეტო დაადო.
• 15 მაისს, პარლამენტმა მხარი არ დაუჭირა, პრეზიდენტ სალომე ზურაბიშვილის მოტივირებულ შენიშვნებს გენდერულ კვოტების გაუქმებაზე და ვეტო დაძლია.

რედაქციისგან: რატომ გვჭირდება გენდერული კვოტირების პოლიტიკა — პოზიციები და ანალიზი