რა ხდება: თსუ-ს მაგისტრატურის სტუდენტების ნაწილი ქვეყანაში რუსული რეჟიმის საწინააღმდეგო აქციებს ეხმაურება და განცხადებას ავრცელებს.

  • სტუდენტების განცხადებით, საფრთხის ქვეშაა საქართველოს ევროპული მომავალი, რის გამოც სწავლის ჩვეულ, სააუდიტორიო ფორმატში გაგრძელებას აღარ აპირებენ.
  • ისინი აღნიშნავენ, რომ იმ ფონზე, როდესაც უკანონოდ იჭერენ ადამიანებს, აყენებენ სიტყვიერ თუ ფიზიკურ შეურაცხყოფას, იქმნება საფრთხე თითოეული მოქალაქისთვის, რაც შეუძლებელს ხდის სტუდენტობისთვის სწავლის გაგრძელებას.

განცხადება: "ჩვენ, თსუ-ს მაგისტრატურის სტუდენტები, ქვეყანაში მიმდინარე პროცესებს თვალს აქტიურად ვადევნებთ, შესაბამისად, გვსურს, გამოვეხმაუროთ ჩვენს მეგობრებს და ჩვენი პოზიცია მკაფიოდ დავაფიქსიროთ.

  • ქვეყანაში შექმნილი ვითარებიდან გამომდინარე, დღეს ისე, როგორც არასდროს, საფრთხის ქვეშ დგას ჩვენი ევროპული მომავალი. ევროპა, რომელიც ჩვენთვის კეთილდღეობას, მშვიდობას და რაც მთავარია, ხარისხიან განათლებას ნიშნავს.
  • ბოლო დღეების განმავლობაში კიდევ უფრო მეტად გაიზარდა ჩვენსა და ჩვენს თანატოლებზე ძალადობა, ფიზიკური თუ სიტყვიერი შეურაცხყოფის ფაქტები. გარდა ამისა, გრძელდება სამოქალაქო აქტივისტების ტოტალური და უკანონო დაკავებები."

ასევე, სტუდენტები ეხმიანებიან თსუ-ის ასოცირებული პროფესორის, ნათია კუპრაშვილის მიმართ განხორციელებულ მუქარასა და დაშინების მცდელობებს და სოლიდარობას უცხადებენ მას.

ბოლო ხაზი: დღეს, 12 მაისს, პარლამენტის შენობასთან რუსული კანონის საწინააღმდეგო აქცია 22:00 საათზე დაიწყო. აქციის სახელწოდებაა გავათენოთ საქართველოსთვის. დემონსტრანტები პარლამენტის წინ გათენებას აპირებენ, რადგან ხვალ, 13 მაისს რუსული კანონის მესამე საკომიტეტო მოსმენა გაიმართება. პლენარულ სხდომაზე კი კანონი სამშაბათს, 14 მაისს გავა ბოლო, მესამე მოსმენით.