მოკლედ: საქართველოს პროკურატურის ინფორმაციით, ბრალდება წარედგინა პირს, რომელიც 5 მაისს, ლადო აფხაზავას და მის შვილს, თავს დაესხა.

დეტალები: შინაგან საქმეთა სამინისტროს გამოძიებით დადგინდა, რომ 2024 წლის 5 მაისს, ლანჩხუთში, ალკოჰოლური თრობის ქვეშ მყოფმა პირმა, მეზობლად მცხოვრებ ლადო აფხაზავაზე და მის 20 წლის შვილზე ფიზიკურად იძალადა, კონკრეტულად, მათ სახის არეში ხელი დაარტყა.

  • მოქალაქეს ბრალდება წარედგინა მუხლით, რომელიც გულისხმობს ძალადობას, ჩადენილი ორი პირის მიმართ.
  • მუხლი 2-წლამდე პატიმრობას ითვალისწინებს.

პროკურატურა ბრალდებულისთვის აღკვეთის ღონისძიების შეფარდების თაობაზე სასამართლოს კანონით დადგენილ ვადაში მიმართავს.

წინაისტორია: 5 მაისს, ლანჩხუთში, საკუთარ სახლთან, ლადო აფხაზავას თავს დაესხა ჯოხებით შეიარაღებული სამი ადამიანი.

  • აფხაზავას თქმით, თავდასხმის დროს, 20 წლის შვილთან ერთად იყო.
  • მისივე თქმით, სამივე თავდამსხმელს იცნობს, მათგან ერთი მისივე კორპუსში ცხოვრობს.

ლადო აფხაზავამ მედიასთან თქვა, რომ მასზე თავდასხმას, რუსული კანონის გაპროტესტებას და აქციებში მონაწილეობას უკავშირებს.

მსგავსი: 700-ზე მეტი მასწავლებელი ლადო აფხაზავას სოლიდარობას უცხადებს

დღეს, 8 მაისს, საქართველოს ეროვნული პლატფორმა ლადო აფხაზავაზე თავდასხმას გამოეხმაურა და შინაგან საქმეთა სამინისტროს და სპეციალურ საგამოძიებო სამსახურს მოუწოდა, დროულად და ყოველმხრივ გამოიძიონ ძალადობის ფაქტი.

გაიგე მეტი: "ვგმობთ აქტივისტებზე და მედიის წარმომადგენლებზე ძალადობას და მოვითხოვთ რეაგირებას!" — ეროვნული პლატფორმა