აზერბაიჯანელ ეკონომისტს და პოლიტიკურ აქტივისტს, გუბად იბადოღლუს პატიმრობა შინაპატიმრობით შეუცვალეს, რადგან, გავრცელებული ინფორმაციით, მისი ჯანმრთელობის მდგომარეობა გაუარესებულია.

პროსამთავრობო საინფორმაციო სააგენტო APA-ს ცნობით, ნარიმანოვის რაიონულმა სასამართლომ გადაწყვეტილება ორშაბათს შუადღისას მიიღო.

იბადოღლუ არის ხელისუფლების ცნობილი კრიტიკოსი და ანტიკორუფციული კამპანიის წარმომადგენელი, ის ლონდონის ეკონომიკის სკოლის უფროსი მოწვეული თანამშრომელია.

იბადოღლუს ჯანმრთელობის ბევრი სერიოზული პრობლემა აქვს, მათ შორის, დიაბეტი და გულის დაავადება. ოჯახის ინფორმაციით, ბოლო კვირებში და თვეებში მისი ჯანმრთელობის მდგომარეობა საგრძნობლად გაუარესდა, რადგან მას არ უწევდნენ სათანადო სამედიცინო დახმარებას.

მისმა შვილმა არაერთხელ განაცხადა, რომ იბადოღლუს მდგომარეობა მალე კრიტიკული იქნებოდა, თუ არ იქნებოდა უზრუნველყოფილი საჭირო სამედიცინო დახმარება.

იბადოღლუ დააკავეს 2023 წლის 23 ივლისს, ხელისუფლების თქმით, თურქი სასულიერო პირის, ქვეყნიდან გადასახლებული ფეთჰულა გიულენის მხარდამჭერების მიმართ მიმდინარე გამოძიების ფარგლებში. გიულენს თურქეთი 2016 წლის გადატრიალების მცდელობაში ადანაშაულებს.

მას შემდეგ იბადოღლუ წინასწარ პატიმრობაშია.

მას, თავდაპირველად, ბრალად ედებოდა ორგანიზებული ჯგუფის მიერ ჩადენილი ყალბი ფულის, ან ფასიანი ქაღალდების წარმოება, შეძენა ან გაყიდვა. მოგვიანებით ბრალი წაუყენეს რელიგიური ექსტრემისტული მასალების მომზადებაში, შენახვაში ან გავრცელებაში.

მისი თანამოაზრეები, ასევე განიცდიდნენ ხელისუფლების მხრიდან ზეწოლას.

იბადოღლუს წინააღმდეგ წაყენებული ბრალდებები ფართოდ განიხილებოდა ადგილობრივი და საერთაშორისო უფლებადამცველი ჯგუფების მიერ პოლიტიკურად მოტივირებულად, Amnesty International ამტკიცებდა, რომ ის დააკავეს "გამოგონილი ბრალდებებით, აშკარა შურისძიების მიზნით, ხელისუფლების კრიტიკის გამო".

იბადოღლუ 2014 წლის შემდეგ, როდესაც მთავრობამ გაყინა მისი ანგარიშები ეკონომიკური კვლევის ცენტრთან და მიერ დაარსებულ არასამთავრობო ორგანიზაციასთან ერთად, ძირითადად, ემიგრაციაში ცხოვრობდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.