მოკლედ: თამთა კალანდაძემ, ლაზარე გრიგორიადისის დედამ, On.ge-ის უთხრა, რომ ლაზარე დღეს, 18 აპრილს ან ხვალ გამოვა ციხიდან:

  • "დღეს ველოდებით [ლაზარეს გათავისუფლებას] ან ხვალ, ადვოკატის ზარს ველოდები, რომ ზუსტად მითხრას".

დეტალები: ლაზარე გრიგორიადისს 12 აპრილს, 9-წლიანი პატიმრობა მიესაჯა.

განაჩენის გამოცხადების შემდეგ, ლაზარეს დედამ და ადვოკატმა, პრეზიდენტ სალომე ზურაბიშვილს შეწყალების თხოვნით მიმართეს.

  • 12 აპრილს, სალომე ზურაბიშვილმა განაცხადა, რომ ლაზარეს შეიწყალებს.

გაიგე მეტი: რას მალავს მოსამართლე, რომელმაც ლაზარეს 9-წლიანი პატიმრობა მიუსაჯა

ლაზარეს საქმის ქრონოლოგია: რუსული კანონის საწინააღმდეგო აქციის მონაწილე, ლაზარე გრიგორიადისი პოლიციამ 2023 წლის 29 მარტს დააკავა.

  • 31 მარტს სასამართლომ ლაზარე გრიგორიადის აღკვეთის ღონისძიების სახით პატიმრობა შეუფარდა.
  • 8 აპრილს გრიგორიადისისთვის პატიმრობის გირაოთი შეცვლის მოთხოვნა სააპელაციომ დაუშვებლად ცნო და ლაზარე პატიმრობაში დატოვა.
  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავებულს ბრალდება პოლიციელის ჯანმრთელობის ხელყოფისა და ცეცხლის წაკიდებით სხვისი ნივთის დაზიანების მუხლებით წარედგინა.
  • დანაშაული 7-დან 11 წლამდე პატიმრობას ითვალისწინებს.

2023 წლის 25 სექტემბერს ლაზარე გრიგორიადისს 2021 წელს მომხდარი ოჯახური ძალადობის საქმეზე 1 წლითა და 6 თვით თავისუფლების აღკვეთა მიუსაჯა. საუბარია მამის, ბექა გრიგორიადისის დაჭრაზე.

  • ამ თემაზე ლაზარეს მამას არაერთხელ უსაუბრია — ამბობდა, რომ შვილთან პრეტენზია არ აქვს.