მოკლედ: მას შემდეგ, რაც უკრაინაში ომის გამო, ევროპის კურორტები რუსებისთვის, პრაქტიკულად, მიუწვდომელი გახდა, რუსეთის ხელისუფლებამ საკუთარი მოქალაქეებისთვის ჩრდილოეთ კორეის სანაპიროებზე დასვენების ორგანიზება გადაწყვიტა.

დეტალები: პრიმორიეს მხარის მთავრობამ შეიმუშავა სპეციალური საზაფხულო ტურები ჩრდილოეთ კორეაში, რომლის ხანგრძლივობა 8 და 12 დღეა. პრიმორიეს საერთაშორისო თანამშრომლობის სააგენტოს ხელმძღვანელმა ალექსეი სტარიჩკოვმა თქვა, რომ პაკეტები მოიცავს დასვენებას საზღვაო კურორტებზე.

  • მანამდე, ჩრდილოეთ კორეაში დასვენება რუსებისთვის მხოლოდ რასონის თავისუფალ ეკონომიკურ ზონაში იყო შესაძლებელი.

ჩრდილოეთ კორეამ, ასევე, დაიწყო ტურისტული ზონის მშენებლობა რუსეთიდან სტუმრების მისაღებად. კურორტზე იქნება 54 სასტუმრო, 29 მაღაზია და ოთხკილომეტრიანი სანაპირო. თუმცა, როგორც პრიმორიას ხელისუფლებამ განაცხადა, მისი გახსნა "მომდევნო წლებშია" დაგეგმილი.

  • რასონის პლაჟების გარდა, რუსეთიდან ჩასულ ტურისტებს შესთავაზეს მოგზაურობა ფხენიანში და ჩრდილოეთ კორეის ლიდერის, კიმ ჩენ ინის მიერ აშენებულ სათხილამურო კურორტზე. ამ გაზაფხულზე ტურის ღირებულება 800 დოლარია, ეს თანხა მოიცავს ფრენასაც, ვლადივოსტოკი - ფხენიანი - ვლადივოსტოკი.

ჩრდილოეთ კორეა ტურისტებისთვის 2020 წლიდან დაკეტილია, პანდემიის გამო. რუსეთიდან მოგზაურთა პირველი ჯგუფი ჩრდილოეთ კორეაში მხოლოდ 2024 წლის თებერვალში გაემგზავრა, მათი ნახევარი პრიმორიეს მკვიდრი იყო.

  • 2022 წლის სექტემბერში, რუსეთის პრეზიდენტმა ვლადიმირ პუტინმა გასცა დავალება, შეიქმნას "კურორტები ყველა სეზონისთვის" შავი, ბალტიის, კასპიის, აზოვის ზღვების სანაპიროებზე და პრიმორიეში. პუტინის თქმით, კურორტებმა, ყოველწლიურად, 10 მილიონი ტურისტი უნდა მიიღონ.