რა ხდება: სახელმწიფო უსაფრთხოების სამსახური (სუსი) ეხმიანება ინფორმაციას, რომლის მიხედვით, თბილისში მცხოვრებ ამერიკელ დიპლომატებზე, რუსული სპეცსამსახურების წარმომადგენლებმა, თავდასხმა განახორციელეს.

  • საუბარია სპეციალური არალეტალური აკუსტიკური იარაღის გამოყენებაზე, რომლის დასხივებაც ჯანმრთელობის აუხსნელ დაზიანებას იწვევს და ცნობილია, როგორც "ჰავანის სინდრომი".
  • ამ თემაზე საუბარია ინსაიდერის, PBS-ისა და Der Spiegel-ის ერთობლივი ჟურნალისტურ გამოძიებაში.

დეტალები: სუსი აცხადებს, რომ მედიასაშუალებებში ინფორმაციის გავრცელების შემდეგ, კიდევ ერთხელ გადაამოწმეს ფაქტები და დამკვიდრებული საერთაშორისო პრაქტიკის გათვალისწინებით, დაელოდნენ საქმესთან უშუალო შემხებლობაში მყოფი პარტნიორი მხარის მიერ გაკეთებულ ოფიციალურ განცხადებას.

  • "როგორც საზოგადოებისთვის ცნობილია, ისეთმა კომპეტენტურმა უწყებებმა, როგორებიცაა ამერიკის შეერთებული შტატების ცენტრალური სადაზვერვო სააგენტო და სახელმწიფო დეპარტამენტი, თავადვე ეჭვქვეშ დააყენეს შემოთავაზებული ჟურნალისტური გამოძიების შედეგების რეალურობა და არ დაადასტურეს ჟურნალისტების მიერ გამოქვეყნებული ფაქტების არსებობა არა მარტო საქართველოში 2021 წელს, არამედ სხვადასხვა წელს მსოფლიოს სხვადასხვა ქვეყანაში, მათ შორის, გერმანიაში, ავსტრიაში, პოლონეთში, კუბაში და სხვ", — წერია სუს-ის განცხადებაში.

სუსი ამ რეაგირებას ამომწურავად მიიჩნევს და ამბობს, რომ "არსებული ვერსიის უსაფუძვლობის ხელახლა მტკიცება საჭირო არ არის".

ასევე, უწყება აცხადებს, რომ საქართველოში, ცალკეულმა პირებმა და მედიასაშუალებებმა ეს საკითხი "სპეკულაციებისთვის გამოიყენეს".

ბოლო ხაზი: ჟურნალისტების საგამოძიებო მასალაში ნათქვამია, რომ 2021 წლის 7 ოქტომბერს, თბილისში, კერძოდ დიღომში მდებარე "ამერიკულ სოფელში", ამერიკის საელჩოს თანამშრომლებზე თავდასხმა განხორციელდა.

  • ქალმა, რომელსაც თავს დაესხნენ, 3 წლის შემდეგ ნახა რუსული სპეცსამსახურების თანამშრომლის, ალბერტ ავერიანოვის ფოტო და მასში თავდამსხმელი ამოიცნო.

ამ თემაზე ვრცლად: "ჰავანის სინდრომი" საქართველოში — ჟურნალისტური გამოძიების დეტალები