რა ხდება: რუსეთში, საბაჟოზე გააჩერეს 9 ძვირადღირებული ავტომანქანა, რომელთა საერთო ღირებულება, დაახლოებით, 200 მლნ რუბლია.

  • რუსეთის საბაჟო სამსახურის ინფორმაციით, მანქანები რუსეთის ტერიტორიაზე საქართველოდან შეიყვანეს.

დეტალები: განცხადების თანახმად, მინერალოვოდსკის საბაჟომ, რომელიც სტავროპოლის ოლქში მდებარეობს, ტოიოტას, მერსედესის და ლექსუსის მარკის 9 მანქანა გააჩერა. რუსი მებაჟეების მტკიცებით, ეს მანქანები კანონდარღვევით გადაჰქონდათ.

  • მათი განცხადებით, ავტომობილები რუსეთში ზემო ლარსის გამშვები პუნქტიდან შევიდა, სადაც მათ უნდა გაევლოთ განბაჟების ტრანზიტული პროცედურა, ბოლო დანიშნულების პუნქტი კი ყირგიზეთი იყო.

"თუმცა, საზღვრის გადაკვეთის შემდეგ, საბაჟოს ნებართვის გარეშე მოათავსეს გადამზიდ ტრანსპორტზე და გადასცეს მძღოლებს, რომლებიც დოკუმენტებში მითითებული არ იყვნენ. დადგინდა, რომ სინამდვილეში, ძვირადღირებული მანქანები მიჰქონდათ მოსკოვში, შემდგომი გადაყიდვისთვის", — ნათქვამია განცხადებაში.

  • მათივე ცნობით, 5 დეკლარანტის მიმართ, რომლებმაც დაარღვიეს საბაჟო ტრანზიტის პროცედურა, მინერალოვოდსკის საბაჟომ, ადმინისტრაციული სამართალდარღვევის 9 საქმე აღძრა.