ტერაბანკი 2024 წელს განსაკუთრებული კამპანიით — "ჩაისუნთქე ახალი წელი" შეხვდა. ახალი წლის წინა დღეებში, თბილისში, ბუკიას ბაღში განსხვავებული საახალწლო ხე დაიდგა. ეს არ იყო მხოლოდ სადღესასწაულო დეკორაცია — ხავსის პანელებით დაფარულ რვამეტრიან საახალწლო ხეს დიადი მიზანი ჰქონდა: ჰაერის ხარისხის გაუმჯობესება და გარემოსდაცვითი საკითხებისკენ მოქალაქეების ყურადღების მიპყრობა. ცოცხალი ხავსით დაფარული წახნაგოვანი ხე ჟოლოსფერი ნათებით ერთდროულად ქმნიდა სიახლის შეგრძნებას, საზეიმო განწყობას და თან, ხავსის სასარგებლო თვისებების საშუალებით, წინასაახალწლოდ მჭიდრო საცობებით დატვირთული ქუჩების ჰაერს წმენდდა. ტერაბანკის საჩუქარი ქალაქისთვის იყო პირველი საახალწლო კონსტრუქცია თბილისში, რომელსაც დეკორატიულთან ერთად გარემოზე ზრუნვის ფუნქციაც ჰქონდა.

ხავსი ბუნების სუპერგმირია, ჟანგბადის მიწოდების იშვიათი უნარების მქონე მცენარე. ხმელეთის ეს ყველაზე მხცოვანი მწვანე ორგანიზმი საუკეთესო ბუნებრივი ფილტრია, რომელსაც ერთნაირად კარგად შეუძლია ჰაერის გაწმენდა ნახშირორჟანგისგან და ჩვენი დაცვა ხმაურისგან. ფესვთა სისტემის გარეშე მცხოვრები ხავსები მთელ სასმელ წყალსა და საკვებს ჰაერისგან იღებენ, რაც იმას ნიშნავს, რომ ისინი შთანთქავენ ყველაფერს, მტვრის ნაწილაკებსაც და მძიმე მეტალებსაც და ძალიან მნიშვნელოვან როლს თამაშობენ სათბური გაზების ემისიების შემცირების პროცესში. სხვა მცენარეებთან შედარებით, ჰაერის გასუფთავებასა და ნახშირბადის შემცირებაში მათი როლი განუზომლად დიდია.

თბილისში ჰაერის დაბინძურება, განსაკუთრებით საცობით დატვირთულ ქუჩებზე, დიდი და კომპლექსური პრობლემაა — ჰაერის ხარისხის გაუმჯობესებისთვის თითოეული ძალისხმევა და ინიციატივა მნიშვნელოვანია: ეკომეგობრული ტრანსპორტის გამოყენება, ფეხით სიარული ავტომობილით გადაადგილების ნაცვლად, მცენარეების დარგვა საკუთარი სახლების აივნებზე, სახურავებსა და ეზოებში თუ სულაც, ხავსისგან საახალწლო ხის დამზადება. თბილისში ჰაერის ხარისხი თითქმის არასოდეს არის ძალიან კარგი: წელიწადში 150-ს არ აღემატება იმ დღეების რიცხვი, როცა ჯანსაღ ჰაერს ვსუნთქავთ. ყოველწლიურად თითქმის ორ თვეს შეადგენს ისეთი დღეების ჯამი, როცა ჰაერი ძალიან არის დაბინძურებული. ჰაერის ცუდი ხარისხი მძიმე გავლენას ახდენს როგორც ცხოვრების ხარისხზე, ისე ადამიანის ჯანმრთელობაზე.

"ტერაბანკში მარკეტინგულ კამპანიებზე მუშაობისას ამოსავალი წერტილი ადამიანებისთვის რეალური სარგებლის შექმნაა. საახალწლო კამპანიაზე ფიქრისას, გადავწყვიტეთ ჩვენი დროის ერთ-ერთი ყველაზე პრობლემური გამოწვევისკენ, ჰაერის დაბინძურებისკენ მიგვეპყრო ყურადღება და გარემოზე ზრუნვის კიდევ ერთი მაგალითი გვეჩვენებინა" — ამბობს ნინი სუჯაშვილი, ტერაბანკის მარკეტინგისა და საზოგადოებასთან ურთიერთობის განყოფილების უფროსი.

საახალწლო კამპანიის ფარგლებში ხავსის საახალწლო ხესთან ჩატარდა ჰაერის გამწმენდი პანელების დამზადების ვორკშოპები, საჩუქრად კი დარიგდა ეკომეგობრული ნაძვის ხის სათამაშოები ხავსის შიგთავსით. კამპანიის ყველა კომპონენტი, როგორიც იყო, საახალწლო ხე, ხავსით გაფორმებული ავტობუსის გაჩერება და ბანკის ფილიალი, ისეთი მასალითა და ტექნოლოგიით შეიქმნა, რომ არ დაეტოვებინა მავნე ნარჩენები, რომლებიც ასე ჭარბად გროვდება სადღესასწაულო დღეების შემდეგ.

ტერაბანკის საახალწლო კამპანია "ჩაისუნთქე ახალი წელი" ერთგვარი შეხსენებაა, რომ ჰაერის დაბინძურების წინააღმდეგ ბრძოლა ყოველთვის მნიშვნელოვანია და ამ პროცესში ყველა ადამიანის ჩართულობა აუცილებელია.