მოკლედ: 22 იანვარს, ირაკლი ღარიბაშვილმა მთავრობის სხდომაზე განაცხადა, რომ დაინგრევა რესპუბლიკური საავადმყოფოს შენობა და მის ბაზაზე ახალი საავადმყოფო აშენდება.

• ამ ფაქტს საავადმყოფოს თანამშრომლები აპროტესტებენ და საპროტესტო აქციებს გეგმავენ.

დეტალები: მედპერსონალი ამბობს, რომ დაპირების მიუხედავად, არ აქვთ გარანტია, რომ მიიღებენ იმ კომპენსაციებს, რასაც მათ ჯანდაცვის სამინისტრო სთავაზობს.

• ისინი კითხვის ნიშნის ქვეშ აყენებენ ახალი საავადმყოფოს აშენების საკითხსაც. შიშობენ,რომ შესაძლებელია, ეს ტერიტორია სხვა მიზნებისთვის გამოიყენონ.
• "ტერიტორია, რომელზეც დღეს რესპუბლიკური საავადმყოფოა, ძალიან კარგი ადგილია დეველოპერებისთვის, საკმაოდ პოტენციურია და დიდი შემოსავალი იქნება, ამიტომ, ბუნებრივია, ეს ეჭვი არის", — ეუბნება On.ge-ს ქირურგი მალხაზ გოგუა.
• კლინიკის თანამშრომლების უკმაყოფილებას იწვევს ისიც, რომ როგორც თავად ამბობენ, გადაწყვეტილების მიღების პროცესში არ ყოფილან ჩართულები.
• ექიმები 2 საპროტესტო აქციას გეგმავენ — ერთი ხვალ, 25 იანვარს 11 საათზე საავადმყოფოს ტერიტორიაზე გაიმართება, მეორე კი — პარასკევს, 26 იანვარს ჯანდაცვის სამინისტროსთან.

ჯანდაცვის სამინისტროს განცხადებით, რესპუბლიკურის თანამშრომლებისთვის კომპენსაციებთან დაკავშირებით, შეთავაზებების პროცესი დაიწყო.

შეთავაზებების პაკეტის მიხედვით:

• ნებისმიერი თანამშრომელი, რომელიც მხოლოდ რესპუბლიკურ საავადმყოფოშია დასაქმებული, კომპენსაციის სახით, ერთჯერადად, 12 თვის ხელფასით იქნება უზრუნველყოფილი;
• თუ კლინიკის თანამშრომელი სხვა დაწესებულებაშიც მუშაობს, კომპენსაციის სახით, 4 თვის ხელფასს მიიღებს;
• სამედიცინო პერსონალი, რომელიც 12-თვიან კომპენსაციაზე უარს განაცხადებს, ჯანდაცვის სამინისტრო, სხვა სამედიცინო კლინიკაში, იმავე პოზიციაზე დასაქმებასა და 4 თვის ხელფასის ოდენობით კომპენსაციას შესთავაზებს;
• სამედიცინო პერსონალი, რომელიც არ მუშაობს სხვა დაწესებულებაში და სამინისტრო, ალტერნატიულ სამსახურს ვერ შესთავაზებს, უწყება, 3 წლის განმავლობაში, დასაქმებამდე, ყოველთვიურ სახელფასო ანაზღაურებას გადაუხდის.

რესპუბლიკური საავადმყოფოს თანამშრომლებმა ჩამოთვლილ შეთავაზებებს შორის არჩევანი 14 დღის განმავლობაში უნდა გააკეთონ.

კონტექსტი: ეს არ არის პირველი შემთხვევა, როცა მთავრობა რესპუბლიკური საავადმყოფოს რეაბილიტაციაზე საუბრობს. ჯერ კიდევ 2023 წლის მარტში ითქვა, რომ რესპუბლიკური საავადმყოფო დაინგრეოდა, მისი შემდგომი რეაბილიტაციის მიზნით.

• ამას, 2023 წლის მარტში, რესპუბლიკურის თანამშრომლების მოთხოვნა მოჰყვა, არ შეცვლილიყო კლინიკის ადგილმდებარეობა: "გვინდა შეგახსენოთ, რომ რესპუბლიკური საავადმყოფო ყოველთვის იყო და არის ქვეყნის წინაშე მდგარი გამოწვევების მიმღები მნიშვნელოვანი სტრატეგიული ცენტრი. ამის დასტურია 9 აპრილი, თბილისის სამოქალაქო, აფხაზეთის და აგვისტოს ომები. მარტო ის გარემოება რად ღირს, რომ კოვიდ პანდემიის დროს კლინიკამ ფორსმაჟორულ რეჟიმში გაატარა 20 000 პაციენტი", — აცხადებდნენ კლინიკაში.
• ასევე, თანამშრომლები ამბობდნენ, რომ ჯანდაცვის მინისტრმა შენობის ნგრევის შესახებ გადაწყვეტილება მათთვის სრულიად მოულოდნელად, ახალი მდებარეობისა და კონცეფციის გაურკვევლად დააანონსა და ეს დროში საეჭვოდ დაემთხვა მედპერსონალის დისკრედიტაციის მცდელობას.