რა ხდება: ნატა ფერაძის მიერ, სამების საკათედრო ტაძარში სტალინის გამოსახულებისთვის საღებავის შესხმას ინტერნეტში განსხვავებული რეაქციები მოყვა. პროტესტის გამოხატვის ამ ფორმას მათ შორის, ჟურნალისტები, აქტივისტები, თეოლოგები და პოლიტიკოსებიც გამოეხმაურნენ.

ბექა მინდიაშვილი: თეოლოგი სოციალურ ქსელში წერს, რომ არ არის მომხრე, პროტესტის ნიშნად, რაიმე ნივთისთვის საღებავის შესხმის, ან ძეგლების ნგრევის. თუმცა, მისი თქმით, უნდა გავითვალისწინოთ, რომ სტალინის "აბსოლუტურად პოზიტიური" გამოსუხლუბა სამების ტაძარში "არის ღვთის გმობა".

• "საქართველოს მართლმადიდებელი ეკლესია დაუშვებელია იყოს სტალინის მადიდებელი .ის აუცილებლად უნდა გათავისუფლდეს ამ უკიდურესი ბოროტებისგან, ამ ღვთის გმობისგან, რომ დაუბრუნდეს ყოვლადწმინდა სამების, ჯვარცმული ქრისტეს დიდება", — წერს მინდიაშვილი.

ნიკა გვარამია: გვარამიას თქმით, საღებავის შესხმით გამოხატული პროტესტით, ხალხს, რომელსაც სტალინისა და მატრონა მოსკოველის ხატის სამებაში ნახვა არ მოსწონს, შესაძლებლობა მიეცა, სტალინის ფაქტორი გვერდზე გადადოს, რადგან წინა პლანზე პროტესტის ფორმით აღშფოთებამ წამოიწია.

• "ახლა ამ ნებაყოფლობით თუ სოციალური პრესის შედეგად არმომწონებელთა უდიდეს ნაწილს შინაგანი არგუმენტი მიეცა (დაუბრუნდა), რომ სტალინის ფაქტორი განზე გადადოს, მისი დამკიდებელი მსხვერპლად გამოაცხადოს და საღებავის შემსხმელზე ილაპარაკოს და ლანძღოს", — წერს გვარამია ფეისბუქზე.

მერაბ მეტრეველი: ჟურანლისტი ფერაძის პროტესტის ფორმას ეხმაურება და წერს, რომ სტალინის ხატზე გამოსახვას, რომელიც "სიმახინჯეა", ვანდალიზმით არ უნდა ვუპასუხოთ. მისი თქმით, ფერაძის ქმედებამ მორალური უპირატესობა დააკარგვინა იმ ხალხს, ვინც ეკლესიაში სტალინის გამოსახვას აპროტესტებს.

• "აქამდე ეკლესია და ამ ხატის დამცველები თავის მართლების პოზაში იდგნენ, ნატას ამ გამოხდომამ კი მათ საშუალება მისცა თავდასხმაზე გამდოსულიყვნენ”, — მიაჩნია მეტრეველს.

თამარ ჯაყელი: სამოქალაქო აქტივისტი სოლიდარობას უცხადებს ნატა ფერაძეს და ამბობს, რომ თუ ვანდალიზმზე ვსაუბრობთ, მაშინ უნდა გვახსენდებოდეს გელათი, რომელიც კულტურის სამინისტროს და ქართული ოცნების უპასუხისმგებლობის გამო, ინგრევა.

• "რაზეც საჭიროა, იმაზე აღშფოთდით", — დაწერა მან.

ანა სუბელიანი: თბილისი პრაიდის ერთ-ერთი დირექტორი ფეისბუქ პოსტში ნატა ფერაძეს სოლიდარობას უცხადებს. მისი თქმით, სრულიად უადგილოა პროტესტის ფორმაზე დისკუსია, როდესაც სახელმწიფოს მიერ წაქეზებული ბრბო ადამიანს წამებით, გაუპატიურებით და მოკვლით ემუქრება და სახლშიც კი უვარდება.

• "თუ ძალა არ გვყოფნის, რომ გავაკეთოთ ის, რაც ნატამ გააკეთა, ნუ ვეცდებით, რომ საკუთარი უძლურება მორალური უპირატესობითა და სტრატეგიულად ფიქრით შევფუთოთ, რათა უკეთ ვიგრძნოთ თავი", — წერს სუბელიანი პოსტში.

თამარ ჩერგოლეიშვილი: პოლიტიკოსი ფეისბუქზე წერს, რომ მისთვის მიუღებელია სხვისი ქონების დაზიანება "პოლიტიკური პროტესტის ნიშნად". მისი თქმით, მოსწონს, რომ სამებაში კიდია ხატი სტალინის გამოსახულებით, რადგან "მგონია რომ საკუთარ სახელს არქმევს ყველაფერს და იოლი ასახსნელი ხდება ჩვენი გზავნილი საპატრიარქოზე", — წერს ჩერგოლეიშვილი.

ბოლო ხაზი: 6 იანვარს პარტია ევროპული საქართველოს წევრმა, გიორგი კანდელაკმა სამების ტაძარში გადაღებული ვიდეო გამოაქვეყნა., სადაც ჩანს მატრონა მოსკოველის ხატი, რომლის ერთ-ერთ ფრაგმენტზე იოსებ სტალინია გამოსახული.

• 7 იანვარს საქართველოს პატრიოტთა ალიანსის წევრებმა ირმა ინაშვილმა გამოაქვეყნა ვიდეო, სადაც ამბობს, რომ მატრონა მოსკოველის ხატი, რომელზეც იოსებ სტალინია გამოსახული, სამების საკათედრო ტაძარს "მათ შესწირეს";
• 9 იანვარს, აქტივისტმა ნატა ფერაძემ თავის სოციალურ ქსელში გამოაქვეყნა ვიდეო, სადაც მატრონა მოსკოველის ხატს ლურჯი საღებავი შეასხეს.
• დღეს, 10 იანვარს, ნატა ფერაძის სახლთან პრორუსული ძალადობრივი მოძრაობა ალტ-ინფომ აქცია გამართა. ისინი სამების ტაძარში მატრონა მოსკოველის ხატისთვის საღებავის შესხმას აპროტესტებენ. ადგილზე მობილიზებული იყო პოლიცია.

მსგავსი: ალტ-ინფოს წევრები ნატა ფერაძის სახლთან აქციას მართავენ, ადგილზე მობილიზებულია პოლიცია

მსგავსი: სამებაში ხატს, რომელზეც სტალინია გამოსახული, ლურჯი საღებავი შეასხეს (ვიდეო)