ის 119 296 კილომეტრი სიგანისაა და მისი დანახვა დედამიწიდანაც შეიძლება (თუ საკმარისად მძლავრი ტელესკოპი და მზის კარგი ფილტრი გაქვთ. არ გაბედოთ და არ ჩაიხედოთ ბინოკლში ან ტელესკოპში მზის ფილტრის გარეშე!)

მას AR2665 ეწოდება და ისეთი ამოფრქვევების გამოწვევა შეუძლია, რომელიც რადიო კავშირს დააზიანებს ჩვენს პლანეტაზე.

მზეზე გამოჩენილი ლაქა დღითიდღე იზრდება

ფოტო: NASA

უკიდურეს შემთხვევაში, მან შეიძლება კომუნიკაციების თანამგზავრები გამოიყვანოს მწყობრიდან და რადიაციული შტორმები გამოიწვიოს. ზოგიერთ ადგილას კი შეიძლება ელექტრული მოკლე ჩართვებიც მოხდეს.

შტორმს ნასას „მზის დინამიკის ობსერვატორია“ აკვირდება გასული კვირიდან მოყოლებული.

სააგენტო აცხადებს, რომ: „ახალი მზის ლაქის ჯგუფი შემოტრიალდა ჩვენკენ და ბევრად უფრო სწრაფად იზრდება“.

„ის პირველი მზის ლაქაა, რომელიც მზეზე გამოჩნდა მას შემდეგ, რაც ჩვენს მნათობზე ორი დღე ლაქები საერთოდ არ ჩანდა. ამ მომენტში ის ერთადერთი მზის ლაქის ჯგუფია ვარსკვლავზე“.

„ის შეიძლება მზიური ამოფრქვევების წყარო იყოს, თუმცა ჯერ ძალიან ადრეა იმის წინასწარმეტყველება, თუ რას გააკეთებს ის“.

მათ დაამატეს: „ისინი ჭორფლებივითაა მზის სახეზე, რომლებიც პატარა ჩანს, თუმცა, ზომა ფარდობითია: ამ მზის ლაქის მუქი ბირთვი რეალურად დედამიწაზე ბევრად დიდია“.

რა არის მზის ლაქა?

მზის ლაქები შედარებით გრილი ადგილებია მზეზე, რომელსაც მზის მაგნიტურ ველთან ურთიერთქმედებები იწვევს.

ისინი იმ რეგიონებში ჩნდებიან, სადაც ინტენსიური მაგნიტური აქტივობაა. როდესაც ეს მაგნიტური ენერგია გამოთავისუფლდება, მზიური ანთებები და უზარმაზარი შტორმები ამოიფრქვევა მზის ლაქებიდან.

ასეთი შტორმები პოლუსებზე საოცარ სანახაობას ქმნიან - პოლარულ ნათებას. თუმცა, ისინი შეიძლება საზიანო იყოს თანამგზავრებისა და, ზოგადად, კავშირგაბმულობისათვის.