იცი რა არის ბუთქემფი?! და თუ არა — მაშინ იცოდე, რომ შენ გამოტოვე ყველაზე საინტერესო, ყველაზე თანამედროვე და ინოვაციური სასწავლო დეზინფორმაციასთან ბრძოლის ბანაკი საქართველოში!

ბანაკში მოხვედრის სურვილი 200-მდე ადამიანმა გამოთქვა, რომელთაგან მხოლოდ 54 ჟურნალისტს, მკვლევრებს და მონაცემთა დამუშავებაზე მომუშავე მეცნიერს მიეცა საშუალება დასწრებოდა, წამყვანი მენტორების (ISFED, GRASS, DFRLab, GMC, IFACT-დან) სამუშაო შეხვედრებს და გამოეყენებინათ თანამედროვე ტექნოლოგიები, რომელიც შექმნეს ისეთმა ინოვაციურმა კომპანიებმა როგორიცაა: Pulsar.ai, MettaMine და Wavetech. Ai.

გაინტერესებთ რა ისწავლეს მონაწილეებმა? გარდა იმისა, თუ როგორ მოახდინონ დეზინფორმაციის ნაკადების და ტენდენციების პროგნოზირება, მონაწილეებმა გაიგეს, როგორ გამოიყენონ ღია წყაროები გამოძიებისთვის და როგორ გამოავლინონ კოორდინირებული ორგანიზებული სოციალური ქსელები. არც მეტი არ ნაკლები, ამ საქმის გაკეთება ისეთი თანამედროვე ტექნოლოგიებითაა შესაძლებელი, როგორიცაა: Datavision, ხელსაწყო, რომელიც კვლევისა და გამოძიებისთვის აგროვებს საჯაროდ ხელმისაწვდომ მონაცემებს ღია საჯარო წყაროებიდან, ავლენს კავშირებს ადამიანებს, კომპანიებს, პოლიტიკურ პარტიებს შორის, გვაძლევს ინფორმაციას საკვლევი ობიექტის შესახებ რეალურ დროში და ახდენს ინფორმაციის და მონაცემთა ვიზუალიზაციას; MediaSpeech, ტექნოლოგია, რომელიც უზრუნველყოფს ვიდეო ან აუდიო კონტენტის ქართულ ენაზე ტრანსკრიფციას. მისი სიზუსტე Google-ის ანალოგიური ხელსაწყოს სიზუსტეს 10-ჯერ აღემატება. და ბოლოს, IBEX — ტექნოლოგია, რომელიც იყენებს მანქანურ სწავლებაზე დაფუძნებით, ახდენს სოციალურ მედიაში მონაცემთა კონსოლიდაციას, აანალიზებს ინფორმაციის ნაკადების ტენდენციებს და ავლენს სოციალურ მედიაში ქცევას.

დეზინფორმაციასთან ინოვაციური ბრძოლის ბანაკის პარტნიორის, ForSet-ის წარმომადგენლის ჯუბო ბერიძიშვილი განმარტებით, ბანაკის მონაწილეებს შესაძლებლობა აქვთ არამხოლოდ მიიღონ ინფორმაცია კვალიფიციური ტრენერებისგან, არამედ პრაქტიკაშიც გამოიყენონ ის ცოდნა, რომელსაც ბანაკის ფარგლებში მიიღეს.

"ბუთქემფი არის ერთადერთი და უნიკალური პლატფორმა, რომელიც საშუალებას აძლევს მედიის და აკადემიის წარმომადგენლებს, ასევე სხვა დაინტერესებულ მხარეებს, უფრო ეფექტურად გამოიყენონ თანამედროვე ტექნოლოგიები. რაც ყველაზე მნიშვნელოვანია, ბუთქემფის მონაწილეებს შესაძლებლობა აქვთ ამ ტენოლოგიებით შექმნან საინტერესო მასალები და ამისთვის მიიღონ ჯილდო", — განმარტავს ბერიძიშვილი.

Zinc Network-ის ინოვაციებისა და სწავლების ლაბორატორიის ხელმძღვანელი ანნა აბზიანიძის თქმით ბანაკს მიმართ უკვე არსებობს ინტერესი საერთაშორისო დონეზეც.

"შეგვიძლია სიამაყით აღვნიშნოთ, რომ ჩვენ ბანაკს უკვე გამოეხმაურა კანადის მთავრობის გლობალური საქმეთა წარმომადგენლობა, რომელიც დეზინფორმაციაზე სწრაფი რეაგირების მექანიზმის მეშვეობით, საერთაშორისო მასშტაბით უცხოური სახელმწიფოს მიერ დაფინანსებული დეზინფორმაციასთან გამკლავებაზე მუშაობს და აფინანსებს დეზინფორმაციის საპასუხო ახალ, ინოვაციურ პროექტებს. კანადის მთავრობამ, საქართველოში სწორედ ჩვენი პროექტი შეარჩია. შედეგად ჩვენ გავზარდეთ როგორც პროექტის გამარჯვებულებისთვის საგრანტო ფონდი, ასევე ბანაკის ფარგლებში აქტივობები", — ამბობს ანნა აბზიანიძე.

და რა მოხდება მერე? ბანაკის მეორე ეტაპზე, მონაწილეები, მენტორების დახმარებით, ისეთ საგამოძიებო და კვლევითი მასალების შექმნაზე მუშაობენ, როგორებიცაა რუსული კავშირები და საინფორმაციო ოპერაციები, ყალბი ამბები, ანტიდასავლური კამპანიები, დეზინფორმაციის კოორდინირებული ქსელები და სხვა.

მასალებზე მომუშავე მონაწილეებისთვის გათვალისწინებულია ჰონორარი, გამარჯვებული ნაშრომების ავტორებისთვის — დამატებითი საგრანტო ფონდი 7500 ლარამდეა. და ეს ყველაფერი არ არის, მასალებზე მუშაობის პარალელურად, გუნდებს შესაძლებლობა აქვთ დაესწრონ DataFest Tbilisi 2023-ს და მოისმინონ მოხსენებები დარგის წამყვანი სპეციალისტებისგან.