ევროპული საქართველოს თბილისის მერობის კანდიდატი, ელენე ხოშტარია მიმართავს თბილისის მერიას, გამოყოს საჭირო ტექნიკა, რის შემდეგაც ხოშტარია მოხალისეებთან ერთად დაასუფთავებს დაბინძურებულ მტკვარს.

"დღეს წვიმის გამო დანაგვიანებული მტკვრის ფოტოების გავრცელების შემდეგ, მომმართა უამრავმა მოხალისემ მტკვრის დასუფთავების სურვილით. თუ თქვენ საკუთარ ვალდებულებად არ მიგაჩნით მდინარეების, მათ შორის, ქალაქის ისტორიულ- ტურისტულ ცენტრში გაწმენდა და აპირებთ სახელისუფლებო სტრუქტურებს შორის ვალდებულებების განაწილების შესახებ დავას, მოგვეცით ჩვენ ყველა საჭირო ტექნიკა და ჩვენი ძალებით, მოხალისეებთან ერთად გავწმენდთ მტკვარს", – აცხადებს ელენე ხოშტარია.

თბილისის მერიის პრესსამსახურში On.ge-ს 7 ივლისს უთხრეს, რომ დაბინძურებული მტკვრის დასუფთავება მათი და თბილსერვის ჯგუფის ვალდებულება არ არის. მერიაში არც იმაზე აქვთ ინფორმაცია, თუ რომელი უწყების კომპეტენციაა მტკვრის გაწმენდა ნარჩენებისგან.

თბილისის მერიის მსგავსად, გარემოს დაცვის სამინისტროც აცხადებს, რომ მტკვრის გაწმენდა მათი ვალდებულება არაა. სამინისტროში On.ge-ს განუცხადეს, რომ მათი ვალდებულება ნარჩენების მართვის პოლიტიკის შემუშავებაა და არა - ნარჩენების მართვა.

ძლიერი წვიმების შემდეგ, წყლის ნიაღვარმა ნაგავი მდინარეში ჩაიტანა, რის გამოც მტკვრის ზედაპირი თითქმის მთლიანად დაფარულია სხვადასხვა საყოფაცხოვრებო ნარჩენებითა და ხის ტოტებით.