სერიალი The Crown (გვირგვინი), რომელიც ბრიტანეთის სამეფო ოჯახს ეხება, მაყურებელმა პირველად 2016 წელს იხილა და მალევე შეიყვარა. ამჟამად შოუს ბოლო, მე-6, სეზონის გამოსვლას ველით, რომელიც როგორც ტრეილერში ჩანს, პრინცესა დაიანას ცხოვრების ბოლო წლებზე და მის ტრაგიკულ ბედზე მოგვიყვება. მის როლს ბოლო სეზონში ელიზაბეტ დებიკი ასრულებს.

ტრეილერში კარგად ჩანს, იმ პერიოდში როგორ იყო საზოგადოება შეპყრობილი პრინცესა დაიანას ცხოვრებით — ვიდეოში პაპარაცების ჯგუფი დაიანას ნებისმიერ ადგილას თან დაჰყვება. ტრეილერით თუ ვიმსჯელებთ, შოუს ფინალურ სეზონში დაიანას ტრაგიკულად დაღუპვის სცენასაც ვიხილავთ.

სერიალის მე-6 სეზონი 1997-2005 წლის მოვლენებს შეეხება და ორ ნაწილად გამოვა — პირველი ნაწილის პრემიერა 16 ნოემბერს იგეგმება, მეორესი კი 14 დეკემბერს. ბოლო სეზონში დედოფალ ელიზაბეტის როლს ლეგენდარული მსახიობი იმელდა სტონტონი შეასრულებს.

ბოლო სეზონში მაყურებელი პრინც ჩარლზისა და კამილა პარკერ ბოულსის ქორწილსაც იხილავს, ამასთან, ფოკუსი დაიანასა და ჩარლზის შვილებზე, ჰარისა და უილიამზეც იქნება. სერიალის აღმასრულებელი დირექტორის თქმით, შოუს დასასრულით ძალიან კმაყოფილია და ფიქრობს, რომ ის გრძელი გზის კულმინაციას ჰგავს.