თუფაქ შაკურის მკვლელობა ამდენი წლის შემდეგაც ერთ-ერთ გაუხსნელ საქმედ რჩება, რომელიც საზოგადოების ყურადღებას მუდამ იპყრობს. 1996 წელს თუფაქ შაკური ლას-ვეგასში ცეცხლსასროლი იარაღით მოკლეს. რეპერი მანქანაში მუსიკალურ პროდიუსერ შუგ ნაითთან ერთად იჯდა. შუქნიშანზე გაჩერებულ მანქანას ცეცხლი გაუხსნეს და რეპერს 4-ჯერ ესროლეს. თუფაქი საავადმყოფოში გადაყვანიდან მალევე გარდაიცვალა, მკვლელობის მრავალწლიანი გამოძიება კი ისევ გრძელდება.

ცოტა ხნის წინ თუფაქის მკვლელობის საქმეზე აშშ-ის პოლიციამ ერთ-ერთი ბანდის ყოფილ ლიდერს ბრალი წაუყენა. დაკავებული პირი დუეინ დევისია, რომელსაც მეტსახელით Keffe D იცნობდნენ. პოლიციის განცხადებით, დევისმა თუფაქისთვის სროლა მას შემდეგ დაგეგმა, რაც მისმა ძმისშვილმა ერთ-ერთ კაზინოში თუფაქთან იჩხუბა.

დუეინ დევისი საკუთარ სახლთან დააკავეს და სასამართლოს წინაშე გამოცხადება რამდენიმე დღეში მოიწევს. ლოს-ანჯელესის პოლიციის ყოფილმა დეტექტივმა, გრეგ კედინგმა, განაცხადა, რომ დევისის დაკავებით გაკვირვებული სულაც არ არის. "შეთქმულების მონაწილე ყველა სხვა პირი მკვდარია, ის კი ამ საქმეში უკანასკნელი ადამიანია", — დასძინა დეტექტივმა.

შეგახსენებთ, რომ რამდენიმე თვის წინ, გარდაცვალებიდან 27 წლის შემდეგ, თუფაქ შაკურს ჰოლივუდის დიდების ხეივანში ვარსკვლავი გაუხსნეს. მართალია, თუფაქი ნიუ-იორკში დაიბადა, მაგრამ მისი სახელი მაინც ლოს-ანჯელესთან ასოცირდება. ხანმოკლე ცხოვრების მიუხედავად, რეპერმა რამდენიმე ფილმშიც ითამაშა. თუმცა, ჰოლივუდის დიდების ხეივანში გახსნილი ვარსკვლავი მას, როგორც მუსიკოსს, ეძღვნება.

მსოფლიოში გაყიდული 75 მილიონი ჩანაწერით თუფაქი ყველა დროის ერთ-ერთი ყველაზე პოპულარული ჰიპ-ჰოპ შემსრულებელია. რეპერმა დიდი გავლენა მოახდინა არა მხოლოდ თავისი თაობის მუსიკოსებზე, არამედ ახალი საუკუნის ამერიკულ კულტურაზეც. 2010 წელს ჟურნალმა Rolling Stone-მა იგი ყველა დროის 100 საუკეთესო მუსიკოსს შორის დაასახელა.