რატომ არის მნიშვნელოვანი: ფინანსთა სამინისტროს საგამოძიებო სამსახურის განცხადებით, ბრალდებულები ადამიანის ჯანმრთელობისათვის საშიში შოკოლადის ნაწარმის რეალიზაციას ახდენდნენ.

  • მათივე ცნობით, ისინი პასუხისგებაში მიეცნენ ადამიანის ჯანმრთელობისათვის საშიში პროდუქციის რეალიზაციისა და ჯგუფურად, საბაჟო დეკლარაციაში ყალბი მონაცემების შეტანის გზით, საქართველოს საბაჟო საზღვარზე განსაკუთრებით დიდი ოდენობით არადეკლარირებული მოძრავი ნივთის გადმოტანის ფაქტზე.

დეტალები: გამოძიების თანახმად, ბრალდებულები უკანონო მატერიალური სარგებლის მისაღებად სხვადასხვა დასახელების უცხოური წარმოების ვადაგასულ შოკოლადს აკრავდნენ ახალი ვადის აღმნიშვნელ სტიკერებს, რის შემდეგაც მას თბილისის სავაჭრო ქსელში ყიდდნენ.

  • საგამოძიებო მოქმედებების შედეგად სავაჭრო ობიექტებიდან ამოიღეს დიდი ოდენობით ვადაგასული შოკოლადი, რომელიც ადამიანის ჯანმრთელობისათვის საშიშ მიკროორგანიზმებს შეიცავდა
  • გარდა ზემოხსენებულისა, ბრალდებულებმა, საბაჟო დეკლარაციაში ყალბი მონაცემების შეტანის გზით, საბაჟო-გამშვები პუნქტის გავლით, საქართველოს ტერიტორიაზე სატვირთო ავტომანქანით გადმოიტანეს, დაახლოებით, 85 000 ლარის საბაჟო ღირებულების არადეკლარირებული, სხვადასხვა დასახელების საკვები პროდუქტი.
  • დანაშაული 8-დან 11 წლამდე პატიმრობას ითვალისწინებს.