შოვში სტიქია 3 აგვისტოს მოხდა. მას შემდეგ სოციალურ ქსელის საშუალებით, მოქალაქეები აქტიურად ითხოვდნენ, რომ დაწყებულიყო გამოძიება და დამდგარიყო შესაბამისი პირების პასუხისმგებლობის საკითხი.

  • მიუხედავად ამისა, ხელისუფლების წარმომადგენლები დუმდნენ და აქამდე გამოძიების დაწყების თაობაზე არაფერი უთქვამთ.

დეტალები: სტიქიიდან მე-5 დღეს საგანგებო სიტუაციების მართვის სამსახურის ხელმძღვანელმა, თემურ მღებრივშვილმა თქვა, რომ "პირველივე წუთებში დაიწყო სისხლის სამართლის გამოძიება, საქმე ორი მუხლით არის აღძრული".

  • ასევე, განაცხადა, რომ გამოძიების მიმდინარეობის დროს, შეიძლება გადაკვალიფიცირდეს მუხლები, თუმცა არ დაუკონკრეტებია, რა მუხლებზეა საუბარი.
  • On.ge-მ შინაგან საქმეთა სამინისტროსთან გაარკვია, რომ გამოძიება დაწყებულია 116-ე მუხლით, რაც გულისხმობს სიცოცხლის მოსპობას სიცოცხლის გაუფრთხილებლობით;
  • ასევე, 240-ე მუხლით — ეს სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

ბოლო ცნობები: ოფიციალური მონაცემებით, ამ დრომდე ნაპოვნია 18 ადამიანის ცხედარი, საიდანაც 14 ვინაობის დადგენა მოხერხდა.

  • სამძებრო სამუშაოები გრძელდება — სტიქიის ზონაში 17 ადამიანს ეძებენ.
  • საგანგებოს ცნობით, დილიდან მუშაობა განაახლა სასაზღვრო პოლიციის ორმა ვერტმფრენმა.