საქართველოს პარლამენტის დეპუტატმა, კახა ოქრიაშვილმა საკონსტიტუციო ცვლილებებთან დაკავშირებით განაცხადა, რომ მიუხედავად განსხვავებული აზრისა, მაჟორიტარები კომპრომისზე წავიდნენ და 2024 წლისთვის დათანახმდნენ პროპორციულ საარჩევნო სისტემას:

"მიუხედავად ყველაფრისა, ასეთი სისტემა ამცირებს მყიფე და არამდგრადი ცენტრალური ხელისუფლების შექმნის შესაძლებლობებს. საქმე ეხება მაჟორიტარული სისტემის გაუქმებას, ამ საკითხში, კონსენსუსის მთავარი მხარე ვართ ჩვენ - პოლიტიკოსები, ვინც მაჟორიტარული არჩევნების მომხრეა, მათ შორის, მოქმედი მაჟორიტარებიც და რაც მთავარია, ჩვენი ამომრჩეველი. მეორე მხარეს წარმოადგენენ პროპორციული სისტემის მომხრეები უმრავლესობიდან და ოპოზიციიდან".

ოქრიაშვილის თქმით, ჯერ კიდევ საჭიროა დრო პარტიების სრულფასოვნად ჩამოსაყალიბებლად და გასაძლიერებლად. მისივე განცხადებით, პროპორციული სისტემის მომხრეები იმედოვნებენ, რომ ეს 2024 წლისთვის მოხდება:

"დავთანხმდით, მიგვეცა დრო და შანსი ამ პროცესისათვის. თუმცა ჩვენ, მაჟორიტარები, მივიჩნევთ, რომ დღეს მოქმედი საარჩევნო სისტემა არის უკეთესი - უფრო გამართული და გამართლებული ჩვენი ქვეყნის რეალობისთვის".

დეპუტატი წერს, რომ მათ გარდა, პოლიტიკური პროცესის სხვა მონაწილეები არ აღმოჩნდნენ მზად კომპრომისებისთვის.

საქართველოს პარლამენტმა 23 ივნისს მეორე მოსმენით მიიღო საკონსტიტუციო ცვლილებების პროექტი, რომელსაც კრიტიკულად აფასებს როგორც არასამთავრობო სექტორი, ისე - ოპოზიცია. საპარლამენტო ოპოზიციის ბოიკოტის მთავარი მიზეზი იყო საარჩევნო სისტემის ცვლილების, კერძოდ მაჟორიტარულიდან პროპორციულზე გადასვლის 2024 წლამდე გადავადება. საკონსტიტუციო რეფორმის პროცესი გააკრიტიკა ვენეციის კომისიის პრეზიდენტმა, ჯანი ბუკიკიომაც. მისი თქმით, კონსტიტუციას, რომელიც ერთი პარტიის მიერაა დამტკიცებული, არ აქვს სრული ლეგიტიმაცია.