განცხადებას ხელს 9 არასამთავრობო ორგანიზაცია აწერს.

რატომ არის მნიშვნელოვანი: პლატფორმა სამართალდამცავ უწყებებს მიმართავს, გაზარდონ უსაფრთხოების ზომები, გაატარონ პრევენციული ღონისძიებები და ითანამშრომლონ კვირეულის ორგანიზატორებთან.

  • არასამთავრობო ორგანიზაციების შეფასებით, მიუხედავად იმისა, რომ წელს პრაიდის ორგანიზატორებმა გადაწყვიტეს, დახურულ სივრცეში ჩაეტარებინათ ღონისძიებები და არ გაემართათ ღირსების მარში, "ამ დრომდე გამოვლენილი აგრესია, მუქარა და ძალადობისკენ მოწოდებები კვირეულის მიმართ ისეთივე მასშტაბური და ინტენსიურია, როგორც ეს 2021 წლის ივლისში იყო".
  • "მოძალადეთა (განსაკუთრებით ძალადობის ორგანიზატორთა) დაუსჯელობა მხოლოდ და მხოლოდ ზრდის დაუცველ გარემოს ყველასთვის. აღნიშნულს კი საგანგაშოდ ემატება ბოლო დროს ხელისუფლების მხრიდან გახშირებული ჰომოფობიური რიტორიკა", — ნათქვამია განცხადებაში.

არა ფობიას მოუწოდებს სამართალდამცავ უწყებებს: მობილიზება გაუკეთონ პოლიციელთა საკმარის რაოდენობას თითოეულ ღონისძიებაზე, რათა შეძლონ დროული რეაგირება ნებისმიერ პოტენციურ ძალადობაზე პრაიდის ორგანიზატორებისა თუ მონაწილეების წინააღმდეგ;

  • გაატარონ პრევენციული ღონისძიებები, კერძოდ, გამოავლინონ ძალადობისკენ მოწოდებისა და მუქარის შემთხვევები, ხოლო უკვე იდენტიფიცირებულ შემთხვევებზე დროულად დაიწყონ გამოძიება და სისხლისსამართლებრივი დევნა მათი გამხმოვანებლების წინააღმდეგ;
  • აქტიურად ითანამშრომლონ პრაიდის ორგანიზატორებთან და ჰქონდეთ მათთან უწყვეტი კომუნიკაცია უსაფრთხოების გეგმის შესამუშავებლად;
  • "შეკრებისა და გამოხატვის თავისუფლება საქართველოს კონსტიტუციით დაცული სიკეთეებია, რომელიც თანასწორად ეკუთვნის ყველას მიუხედავად მისი სექსუალური ორიენტაციისა თუ გენდერული იდენტობისა. ლგბტქი+ ჯგუფს აქვს უფლება, ყველა სხვა ჯგუფის მსგავსად შეიკრიბოს, იზეიმოს მრავალფეროვნება და ამავდროულად, გამოხატოს სოლიდარობა საქართველოში თანასწორუფლებიანობის კუთხით არსებული გამოწვევების მიმართ", — ვკითხულობთ პლატფორმის განცხადებაში.