აზერბაიჯანის მთავარი პროკურორის მოადგილემ, კამრან ალიევმა დაკავებული აზერბაიჯანელი ჟურნალისტის, აფგან მუხტარლის შესახებ თქვა, რომ გამოძიება დაადგენს, თუ რატომ გადაკვეთა მან საქართველო-აზერბაიჯანის საზღვარი უკანონოდ. მუხტარლის საქმეზე მან რუსთავი 2-ის ჟურნალისტის შეკითხვებს უპასუხა. კამრან ალიევი პროკურორთა კონფერენციაზე დასასწრებად, თბილისში იმყოფება:

"მას უნდა ჰკითხოთ, თუ რატომ მოხვდა ის აზერბაიჯანის ტერიტორიაზე, რა მიზნით გააკეთა და რატომ მოხდა ეს უკანონოდ. დანაშაულში ეჭვმიტანილი ადამიანები ყველაფერს თავის სასარგებლოდ ამბობენ და ეს მათი უფლებაა. ჩვენი საქმე კი ობიექტური გამოძიებაა იმისა, რომ მან უკანონოდ გადაკვეთა საქართველო-აზერბაიჯანის საზღვარი და დაკავებულ იქნა აზერბაიჯანის ტერიტორიაზე. მე არ მეჩვენება საეჭვოდ მისი გადმოსვლა აზერბაიჯანის ტერიტორიაზე".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.