ამის შესახებ მთავრობის სხდომის დასრულების შემდეგ ეკონომიკის მინისტრმა, ლევან დავითაშვილმა ისაუბრა.

რატომ არის მნიშვნელოვანი: მისი თქმით, საკანონმდელო პაკეტი დღეს მთავრობის სხდომაზე განიხილეს, ის პარლამენტს უახლოეს ხანებში გადაეგზავნება, ცვლილებები კი საავტომობილო ტრანსპორტის შესახებ კანონში შევა.

  • დავითაშვილის განცხადებით, კანონპროექტი სანებართვო სისტემაში შიდარეგულარული სამგზავრო გადაყვანის მოქცევას ითვალიწინებს.
  • ასევე, დაიხვეწება საერთაშორისო გადაყვანა-გადაზიდვის პროცესის მარეგულირებელი ნორმები და სახმელეთო სააგენტო ავტოსადგურების სერთიფიცირებას განახორციელებს.
  • მინისტრის თქმით, ქვეყაში უამრავი ავტოსადგურია, რომელიც ვერანაირ სტანდარტსა და წესს ვერ აკმაყოფილებს, არ არის დაცული უსაფრთხოება და ხარისხიც ძალიან დაბალია.
  • "ეს ჩვენი ქვეყნის ვიზუალზეც აისახება, ტურიზმის სექტორზეც, რა თქმა უნდა, ჩვენი მოქალაქეები არც ისე კომფორტულ პირობებში სარგებლობენ შიდა, საქალაქთასორისო, თუ საერთაშორისო გადაზიდვებით".

რა იგეგმება: კანონპროექტის მიხედვით, მთავრობა აპირებს, ავტოსადგურებს კონკრეტული მოთხოვნები დაუწესოს, რომლის საფუძველზეც სამი ტიპის — პირველი, მეორე და მესამე კლასის ავტოსადგურები განისაზღვრება.

  • კერძოდ, როგორც დავითაშვილმა თქვა, დიდ ქალაქებში იქნება პირველი კლასის ავტოსადგურები, რომლებიც საერთაშორისო სტანდარტებს დააკმაყოფილებენ.
  • მცირე მუნიციპალურ ცენტრებში კი იქნება მცირე მოთხოვნებით, მაგრამ თანამედროვე ვიზუალურისა და მინიმალური კომფორტის და უსაფრთხოების პირობების მქონე ავტოსადგური.
  • გარდა ამისა, ავტოსადგურები სერთიფიცირებას დაექვემდებარებიან, რომლის ჩატარების წესსაც მთავრობა განსაზღვრავს.
  • "თითოეული მუნიციპალიტეტი განსაზღვრავს თავის ტერიტორიაზე ავტოსადგურის განთავსების მიზანშეწონილობას და მუნიციპალიტეტებსაც თავისი უფლებამოსილებები განესაზღვრებათ".

დეტალები: დავითაშვილის თქმით, 2024 წლის თებერვლამდე პირველი ეტაპის მოთხოვნები უნდა დააკმაყოფილონ გადამზიდავებმა, 2025 წლის მაისისთვის კი ავტოსადგურების რეფორმა სრულად უნდა განხორციელდეს.

  • კითხვაზე, მოიმატებს თუ არა მგზავრობის საფასური, მინისტრი ამბობს, რომ ეს მოსალოდნელი არ არის.
  • "პირიქით, ეს იქნება გამჭვირვალე პროცესი, პროგნოზირებადი იქნება, გარკვეულ ლოგიკას დაექვემდებარება ბილეთების ფასები, ზოგ შემთხვევაში შეიძლება გაიაფდეს. ზოგადად, ამ რეფორმების ფარგლებში, ბილეთის ფასის გაძვირებას არ ველოდებით".