საქართველოს პრემიერმინისტრმა გიორგი კვირიკაშვილმა საგანგებო განცხადება გაავრცელა, რომელშიც მან გიგა ოთხოზორიას მკვლელის დაუყოვნებელი დაპატიმრება მოითხოვა.

პრემიერის თქმით, ინციდენტმა კითხვის ნიშნის ქვეშ დააყენა ის "პოზიტივი", რომელსაც ქართულმა მხარემ ნდობის აღდგენის პროცესში მიიაღწია.

კვირიკაშვილმა განაცხადა, რომ არსებობს რისკი, რომ მკვლელს ვინმე გაუსწორდეს, ამიტომ მაღალი რისკების გათვალისწინებით, ყველაზე რაციონალური გადაწყვეტილება გიგა ოთხოზორიას მკვლელის დაპატიმრებაა:

"მოცემულ ვითარებაში, არსებობს რისკი, რომ მკვლელს ვიღაც გაუსწორდეს. უფრო მეტიც, შეიძლება, ეს გააკეთოს იმ მხარემ, რომელიც პირდაპირ არის დაინტერესებული ნდობის აღდგენის პროცესის ჩაშლით.

ამიტომ, ვფიქრობთ, სასწორზე დევს ძალიან დიდი რამ! რისკები ძალიან მაღალია. არის ერთადერთი რაციონალური და სწორი ქმედება - ესაა მკვლელის დაუყოვნებლივ დაპატიმრება, თუნდაც დე-ფაქტო ხელისუფლების ხელთ არსებული ცალმხრივი, ჩვენს მიერ არაღიარებული ჩარჩოს ფარგლებში".

ქართველებსა და აფხაზებს შორის ნდობა უნდა აღდგეს. ასეთი სისასტიკით ჩადენილი დანაშაულის დაუსჯელობა კი მხოლოდ გახსნის იარებს, რაც მხოლოდ ქართველი და აფხაზი ხალხის მტრების ინტერესშია

გიორგი კვირიკაშვილი

პრემიერის თქმით, "უაღრესად" გართულებულია ინციდენტების პრევენციისა და მათზე რეაგირების მექანიზმზე შეხვედრების გაგრძელება და მანამ, სანამ დე-ფაქტო ხელისუფლების წარმომადგენლები, გიგა ოთხოზორიას მკვლელის დაკავებასთან დაკავშირებით, უმოქმედობას იჩენენ, ჟენევის დისკუსიების ფორმატში მიმდინარე დიალოგი ფერხდება:

"გალის ინციდენტების პრევენციისა და მათზე რეაგირების მექანიზმის ბოლო შეხვედრის ფარგლებში, რომლის აღდგენაც, ვფიქრობთ, ძალიან დიდი მუშაობის შედეგი იყო, ჩვენმა წარმომადგენლებმა შეხვედრის მონაწილეებს გადასცეს ყველა მასალა, მაგრამ სამწუხაროდ შედეგი არ დადგა.

გალის შეხვედრის ფარგლებში, ჩვენ, რა თქმა უნდა, მოვითხოვეთ დამნაშავის დაუყოვნებლივ გადმოცემა, მაგრამ აფხაზეთის დე-ფაქტო ხელისუფლების წარმომადგენლებმა ეს პირდაპირ დაუკავშირეს სტატუსის საკითხს და აპელირება მოახდინეს შესაბამისი საკანონმდებლო ჩარჩოს არარსებობაზე. საკითხის საგანგებო ხასიათიდან გამომდინარე, ვფიქრობთ, რომ ამ ეტაპზე კრიტიკულად მნიშვნელოვანია, მკვლელი დაუყოვნებლივ იქნას დაპატიმრებული.

ქართველებსა და აფხაზებს შორის ნდობა უნდა აღდგეს. ასეთი სისასტიკით ჩადენილი დანაშაულის დაუსჯელობა კი მხოლოდ გახსნის იარებს, რაც მხოლოდ ქართველი და აფხაზი ხალხის მტრების ინტერესშია. შესაბამისად, ჩვენ გვმართებს ცივი გონება, რათა ჩიხში შესული არსებული სიტუაცია ერთობლივი ძალისხმევით შემოვაბრუნოთ".

19 მაისს აფხაზეთის საოკუპაციო ხაზთან, საქართველოს კონტროლირებად ტერიტორიაზე, ოკუპირებული ტერიტორიიდან გადმოსულმა პირებმა საქართველოს მოქალაქე გიგა ოთხოზორია მოკლეს.