რატომ არის მნიშვნელოვანი: საოკუპაციო რეჟიმი როგორც აფხაზეთის, ისე ცხინვალის რეგიონის ტერიტორიების მიმდებარედ საქართველოს მოქალაქეებს იტაცებს ან უკანონოდ აპატიმრებს.

  • მაგალითად, ცხინვალის დე ფაქტო უსაფრთხოების სამსახურის ცნობით, ე.წ. საზღვრის უკანონო კვეთის ბრალდებით მხოლოდ ერთ თვეში 45 პირი დააკავეს.
  • ოკუპირებულ რეგიონებში ციხეებში ხშირად ირღვევა ადამიანის უფლებები.

დეტალები: გორის მუნიციპალიტეტის სოფელ ერგნეთის მიმდებარედ, ოკუპირებულ ტერიტორიაზე საქართველოს მოქალაქის უკანონოდ დაკავების შესახებ სუს-მა 22 საათის წინ განაცხადა, ახლა კი იმავე ტერიტორიაზე კიდევ ერთი მოქალაქის დაკავებაზე იუწყება.

  • უწყებაში ამბობენ, რომ გააქტიურებულია ევროკავშირის სადამკვირვებლო მისიის ცხელი ხაზი, ასევე, ეცნობათ საერთაშორისო პარტნიორებსა და ჟენევის დისკუსიების თანათავმჯდომარეებს.
  • "საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას", — ვკითხულობთ განცხადებაში.
  • გარდა ამისა, 11 მაისს გორის მუნიციპალიტეტის სოფელ მეჯვრისხევის მიმდებარედ ხოლო 14 მაისს სოფელ ნიქოზის მიმდებარედაც დააკავეს მოქალაქეები — ამ დროისთვის ორივე მათგანი თავისუფალია.