პარტია გირჩი საარჩევნო სისტემასთან დაკავშირებით აცხადებს, რომ იგი უნდა გახდეს სრულად პროპორციული და საერთოდ გაუქმდეს საარჩევნო ზღვარი.

გირჩი სრულად ეთანხმება არასამთავრობო ორგანიზაციების 21 ივნისს გავრცელებულ განცხადებაში გაჟღერებულ პოზიციას და მოუწოდებს საქართველოს ხელისუფლებას, შეცვალოს გადაწყვეტილება შერეული საარჩევნო სისტემის შენარჩუნებაზე.

ქართულმა ოცნებამ განაცხადა, რომ პროპორციულ საარჩევნო სისტემაზე გადასვლა 2020 წლის საპარლამენტო არჩევნებისთვის არ მოხდება, რადგან ქართული ოცნების შიგნით ამ საკითხზე თანხმობის მიღწევა ვერ მოხერხდა.

"ეს იმას ნიშნავს, რომ კონსტიტუციის ახალი პროექტი, მიუხედავად მისი განხილვის 20 ქალაქში მოწყობილი სპექტაკლებისა, წარმოადგენს არა ფართო პოლიტიკური კონსენსუსისა და საქართველოს მოქალაქეების ნების, სურვილებისა და მიზნების ასახვას, არამედ ერთი კონკრეტული პოლიტიკური ჯგუფის მიერ ხელისუფლებაში უსამართლო საარჩევნო სისტემის საშუალებით უვადოდ დარჩენის მცდელობას".

გირჩში მიიჩნევენ, რომ საარჩევნო ზღვრის ერთჯერადად 3%-მდე დაწევა და გადაუნაწილებელი მანდატების გადანაწილებისთვის ზედა და ქვედა რაოდენობრივი ზღვრის დაწესება არსებითად არაფერს ცვლის:

"მაჟორიტარული სისტემის შენარჩუნება არსებულ პოლიტიკურ მოცემულობაში უზრუნველყოფს მმართველი პარტიის გამარჯვებას მომავალ საპარლამენტო არჩევნებში".

გირჩის განცხადებაში ნათქვამია, რომ ვენეციის კომისიის რეკომენდაციები "ფარატინა ფურცლად რჩება ქართული ოცნების ხელში":

"რეკომენდაციებში ხაზგასმით წერია პროპორციულ საარჩევნო სისტემაზე გადასვლის უპირატესობაზე. ვენეციის კომისიის მიმართ სრულიად ინდიფერენტულ და, ჩვენი აზრით, შეურაცხმყოფელ დამოკიდებულებაზე მიუთითებს თუნდაც კონსტიტუციური მონარქიის იდეის უპასუხისმგებლო ატაცება მმართველი პარტიის წევრების მიერ".