საპარლამენტო უმრავლესობის წევრის, ირაკლი სესიაშვილის თქმით, აფგან მუხტარლის საქმეზე მიღებული ევროპარლამენტის რეზოლუციით, ევროპარლამენტმა თქვა ის, რასაც საქართველოს პარლამენტი და მთავრობა ამბობს. სესიაშვილი მიუთითებს იმაზე რომ მათაც [ხელისუფლებას] სურთ, სრულყოფილი გამოძიება ჩატარდეს:

"ევროპარლამენტმა თქვა ის, რასაც ამბობს ჩვენი პარლამენტი და ჩვენი ხელისუფლება. რაც შეიძლება სწრაფად, საერთაშორისო საზოგადოებას უნდა ვუთხრათ რა მოხდა. რა თქმა უნდა, ჩვენს სამართალდამცავ ორგანოებს არანაირი შემხებლობა არ აქვთ ამ ფაქტთან დაკავშირებით. რაც მოხდა არის ცუდი. ჩვენი ქვეყნის ინტერესები დაზიანდა, ამიტომ ეს ჩვენი ღირსების ნაწილია, ყველამ გაიგოს ყველაფერი".

დღეს, სტრასბურგში ევროპარლამენტის პლენარულ სესიაზე, აფგან მუხტარლის საქმეზე რეზოლუცია მიიღეს, სადაც დეპუტატებმა აზერბაიჯანს, დაკავებული ჟურნალისტის გათავისუფლებისკენ, საქართველოს კი, გამჭვირვალე გამოძიებისკენ მოუწოდეს. დეპუტატები ასევე საუბრობენ იმაზე, რომ შესაძლოა, საქართველოს, როგორც დამოუკიდებელ ქვეყანას, ამ საქმის გამო, რეპუტაცია შეელახოს.