მოწყენილი ფისო, რომელიც ცოტა ხნის წინ ნიუ-ჯერსის ცხოველთა თავშესაფარში ცხოვრობდა, დღეს უკვე ახალი მზრუნველი პატრონის სახლში დაბინავდა. ყველაფერი მას შემდეგ დაიწყო, რაც ტვიტერის მომხმარებელმა მოწყენილი ფიშტოფერის ფოტო გამოაქვეყნა და ცხოველთა თავშესაფრის ვებგვერდიც მიუთითა.

"ფიშტოფერი საყვარელი და მშვიდი ბიჭია, ცოტათი ზარმაციც. თუმცა უფრო "მოლაპარაკე" ხდება, როცა საკვებსა და ზრუნვას ითხოვს", — ამგვარად იყო დახასიათებული ფისო თავშესაფრის ვებგვერდზე. განცხადებაში ასევე ნათქვამი იყო, რომ ის ახლა ძალიან მოწყენილი და დეპრესიულია, რაც ოჯახის დაკარგვითაა გამოწვეული, რადგან ადრე სულ ეფერებოდნენ და ეთამაშებოდნენ.

ტვიტერის პოსტი 167 ათასმა ადამიანმა მოიწონა და ორი დღის შემდეგ ფიშტოფერს ახალი პატრონები — ლაურა და მისი შეყვარებული გამოუჩნდნენ. ფისო თავშესაფრიდან წამოიყვანეს და მისი სრული ისტორიის შესახებ ტიკტოკიც გამოაქვეყნეს, რომელიც ასევე ვირუსულად გავრცელდა.

@mister.fishtopher

♬ original sound - Fishtopher the Cat

"ფიშტოფერი განსაკუთრებულია. თავიდან არც კი შემიმჩნევია რამდენად პოპულარული იყო მისი ფოტო, უბრალოდ ფისო დავინახე, რომელსაც სახლი სჭირდებოდა. მისი თვალები ადამიანისას ჰგავს და ძალიან ემოციურია", — ამბობს ლაურა. ფისოს ახალ პატრონს იმედი აქვს, რომ ფიშტოფერი მალე დეპრესიას დაამარცხებს, რისი ნიშანსაც შემდეგ ფოტოებზე ვხედავთ:

ფოტო: Instagram

"იმედი მაქვს, რომ ის ადამიანები, რომლებიც ფიშტოფერით დაინტერესდნენ, სხვა ფისოებზეც იზრუნებენ. ვფიქრობ, რომ სევდიანი ფიშტოფერის ისტორიამ ბევრ ადამიანს ოპტიმიზმის გრძნობა გაუღვივა", — დასძინა ლაურამ.